Шеберлер үйі ашылады
<p style="text-align: justify;">Шеберлер үйін ашу – жергілікті қолөнершілердің көкейіндегі арман. Осы арман орындалып, Нұр-Сұлтанда «Шеберлер үйі» ашылатын болды. Тұрақты орынжай мен бөлек ғимарат болса, шебердің айы оңынан туғаны.</p>
«Жоба «Рухани жаңғыру» бағдарламасы шеңберінде жүзеге асырылады және әлеуметтік бейімделуге, курстарда дағдыларды алуға және тұрақты жұмыспен қамтамасыз етуге бағытталуы тиіс. Жаһандану жағдайында қазіргі заманғы саналы ұрпақты қалыптастыру және жеке тұлғаны тәрбиелеу – бүгінгі күннің басты міндеттерінің бірі», деді «Қоғам және мемлекет: серіктестік пен дамудың 30 жылы атты «Birgemiz» IX Азаматтық форумы кезінде Нұр-Сұлтан қаласы әкімінің орынбасары Бақтияр Мәкен.
Бүгінде елордада бірнеше үкіметтік емес ұйым қазақтың дәстүрлі қолөнерін жандандыру бағытында жұмыс істейді. «Астана-Береке», «Путь мастерства» сынды бірлестіктер елорда мектептерінің оқушылары үшін қолөнермен айналысатын ақысыз үйірмелер өткізеді. Сондай-ақ көп балалы аналар, ерекше қажеттіліктері бар балалар, аз қамтылған отбасылардан шыққан адамдар қолөнерді ақысыз негізде оқиды. Олар матамен және ағашпен, зергерлік бұйымдармен жұмыс жасауды үйренеді.