Жылжымалы медициналық кешен жеткізілді
<p style="text-align: justify;">Елімізде ауылды жерлерде тұратын халықты бастапқы меди­ци­на­лық диагностикамен қамтамасыз ету мақсатында 100 жыл­­жымалы медициналық кешен жеткізіле бастады. Бұл тура­­лы Ин­дус­трия және инфрақұрылымдық даму министрлігі ха­­бар­ла­ды.</p>
Өңірлерді осы кешендермен қамту жұмыстары қарашаның соңында аяқталады деп жоспарлануда. Аталған жылжымалы қондырғы азаматтардың денсаулығын кең спектрлі тексеруден өткізуге арналған. Ол жалпы қабылдау, тәжірибелік дәрігер және талдауларды қабылдау аймағы, дәріхана пункті, функционалды диагностика, акушер-гинеколог, сондай-ақ сәулелік диагностика кабинеттерінен тұрады.
Мобильді медициналық орталықта арнайы қорғасынмен қапталған бөлме орнатылып, онда рентген және флюорографияны қауіпсіз жағдайда жасауға болады.
Кабинеттер компьютер, еден таразысы, отоскоп, офтальмоскоп, биохимиялық және гематологиялық анализатор, коагулограф, лейкоциттер есептегіші, ЭКГ, УДЗ, глюкометр секілді заманауи цифрлы жабдықтармен қамтылған.
Медициналық кешеннің тағы бір ерекшелігі – автономды жүйе, атап айтқанда автобуста 16 киловаттық генератор орнатылып, қажет кезде қалалық электр желісіне де қосылуға қауқарлы. Толық термооқшаулау және антиковид жүйесі қауіпсіз жұмыс істеу үшін оңтайлы жағдай жасайды. Мүмкіндігі шектеулі жандарды қабылдауға автоматтандырылған пандус-лифт қарастырылған.
Жылжымалы медициналық кешен Денсаулық сақтау министрлігінің тапсырысына сәйкес, отандық кәсіпорындарда жасалды.
Денсаулық сақтау министрлігі мен Индустрия және инфрақұрылымдық даму министрлігінің Жол картасы аясында «Өнеркәсіпті дамыту қоры» АҚ лизингтік қаржыландыру тетігі есебінен елімізде биыл ұзын саны 1167 санитарлық автокөлікті жаңарту жоспарланған.