Салық өсімпұлы кешірілген кезең

Салық рақымшылығы бүгін, яғни 31 желтоқсанда аяқталады. Ресми деректерге сүйенсек, бұл мүмкіндікті 820 157 қазақстандық тиімді пайдаланған. Олар 11,5 млрд теңге көлеміндегі негізгі қа­рызды жапқан. Соның нәти­же­сін­­де аталған қарыздар бойынша жи­нақталған 1,4 млрд көлеміндегі өсімпұл кешірілді.

Мемлекеттік кірістер коми­те­тінің хабарлауынша, ел тұр­ғын­да­ры 100 299-ы көлік салығын, 482 587-сі жер салығын және 505 677-сі мүлік салығын төлемеген. Бүгінгі таңда 21 қазақстандықтың мойнында 4 млн теңге көлеміндегі көлік салығы бар. 15 қазақстандық 1 млн теңге көлеміндегі жер салы­ғын төлемеген. Сондай-ақ 33 адам 1 млн теңге көлеміндегі мүлік салығын мемлекетке төлеуі тиіс.

Жалпы алғанда салық рақым­шы­лығына дейін 1,5 млн жеке тұлғаның 24,6 млрд теңге көле­мін­де­гі салықтығы берешегі болған еді. Оның 20,3 млрд теңгесі – негіз­гі берешек, 4,3 млрд теңгесі – өсімпұл.

2020 жылы қаржы сала­сындағы цифрландыру жұ­мыс­­тары да ойдағыдай жал­ғас­ты. Бұл да мемлекет маңыз беріп отырған үлкен мін­деттердің бірі. Өйткені цифр­ландыру көлеңкелі экономиканың үлесін қысқартып, қызметтер сапасын арттыруға жол ашады. Сондай-ақ бюджетке қосымша түсімдер түсіруді қамтамасыз етеді. Осы орайда, «АСТАНА-1» жүйесін бөле-жара атап өтуге тиіспіз. Қаржы министрлігінің хабарлауынша, қараша айының ортасындағы дерек бойынша «АСТАНА-1» жүйесінде 2,7 млн-нан астам декларация өңделген. Оның ішінде 2,2 млн-нан астам декларация автоматты режімде 1 минуттың ішінде шығарылған.

Сонымен қатар сыртқы эко­номикалық қызметке қатысу­шылар үшін экспорттық-им­порттық операциялар бойынша «Бір терезе» порталы іске қосылды. Оның жұмысы кедендік ре­сімдеу үдерістеріне дейін туын­­дай­тын тауарды жіктеу бо­­йынша түрлі сертификаттар­ды, рұқсаттарды, алдын ала шешім­дер­ді алу мәселелерін шешуге бағытталған.

Цифрландыру бағытындағы келесі қадам тауарлардың таңба­лануы болмақ. «Таңбалау» ақпа­раттық жүйесі тұтынушыны конт­рафактілік өнімнен және жосық­сыз бәсекелестіктен қор­ғайды.

Тауарларды құжаттық тұрғы­дан бақылау «Электронды шот-фактуралар» ақпараттық жүйе­сінде жүзеге асырылуда. Онда қосымша құн салығын төлеушілер 2019 жылғы 1 қаңтардан бастап шот-фактураларды электронды түрде толтырады. Бұл та­­уар ағындарының ашықтығына қол жеткізуге, бақылау және қо­сым­ша құн салығын қайтару рәсімдерін оңтайландыруға мүм­­кіндік береді. Бұдан бөлек, «Электронды шот-фактуралар» ақ­параттық жүйесінде салық төлеушілерге ыңғайлы болу үшін орындалған жұмыстардың актілері, электрондық шарттар, сондай-ақ «Виртуалды қой­ма» модулі іске асырылды. Онда виртуалды белгілер бойын­ша та­уар­дың қозғалысы қадаға­ла­нады. Қадағаланатын тауарлар жүйесіндегі соңғы қадам – онлайн бақылау-кассалық машинасын қолдану. Ол сауда түсімінің мәліметтерін тіркейді және оларды мемлекеттік кірістер орган­дарының серверіне онлайн ре­жімде ұсынады.

Алдын ала деректер бойынша биылғы 11 ай­дың қо­рытындысы бойынша мемле­кет­тік бюджеттің атқарылу көр­сет­кіштері жоспар­да­ғыдай орындалған. Мемлекеттік бюджетке 8 трлн теңге кіріс түскен. Респуб­лика­лық бюджет­ке түскен кіріс – 5 трлн 224 млрд теңге. Жалпы кірістер бо­­йынша жос­пар 74 млрд теңгеге артығымен орындалған.

Министрліктің мәліметінше, 2016-2020 жылдарға арналған жекешелендірудің кешенді жоспары 93 пайызға орындалды. 2020 жылы 76 нысанды жекешелендіру жоспарланған еді. Оның 37-і сатылымға шығарылды. 11 айдың қорытындысы бойынша 100,9 млрд теңгеге 8 нысан сатылды. 29 нысан сатылымда тұр, жетеуі қайта ұйымдастыруға және таратуға жіберілді. 20 нысанды жекешелендіру мерзімі 2021-2024 жылдарға ауыстырылды.