«Автомобилистен» айласын асырды
<p style="text-align: justify;">Құрлықтық хоккей лигасында (ҚХЛ) бақ сынайтын елорданың «Барыс» клубы тұрақты біріншіліктің сырт айдын сериясындағы соңғы ойынын Екатеринбургте жергілікті «Автомобилистпен» өткізді.</p>
Биылғы маусымдағы екі команда арасындағы алғашқы ойын қазан айында «Уралец» спорт кешенінде өтіп, мұзайдын иелері 3:2 есебімен басым түскен еді. Араға үш ай салып екі ұжымның жолы тағы да дәл сол спорт кешенінде түйісті. Алайда бұл жолы жерлестеріміз 3:2 нәтижесімен жеңіске жетіп, қарсыластарынан есе қайтарды. Кездесу бастала сала ойын тізгінін өз қолдарына алған «Барыс» хоккейшілері 4-минутта есеп ашты. «Амурға» қарсы өткен алғашқы ойынның қаһарманына айналған Роман Старченко бұл жолы да мергендігімен көзге түсті. Ал кезең ортасында Якоб Лилья (10-минут) қонақтардың басымдығын нығайтты.
Екінші кезеңнің басында «Барыс» құрамына жуырда ғана қосылған Кирилл Панюков (23-минут) маусымдағы алғашқы, командасының ойындағы үшінші голын соқты. Үзіліске аз уақыт қалғанда Анатолий Голышев (38-минут) есеп айырмасын қысқартуға мүмкіндік алды. Соңғы айналымда Питер Холланд есепті 3:2-ге жеткізгенімен, командасын жеңілістен құтқарып қала алмады. Жерлестеріміз кейінгі кездесуін ертең елордадағы «Барыс Арена» спорт кешенінде Қазанның «Ак Барс» клубымен өткізеді.