Боранда 130 көлік соқтығысты
<p style="text-align: justify;">Жапонияда қар­­­л­ы боранның сал­дарынан жолда 130 көлік соқ­ты­ғыс­қан. Бір адам қаза тауып, 10 адам жа­ра­лан­ған. Оған қоса бірнеше шақы­рымға созыл­ған кептеліс пайда болған.</p>
Қарлы боран Жапонияның солтүстігінен оңтүстігіне, Мияги префектурасының солтүстік-шығыс аймағынан өтетін Тохоку жоғары жылдамдықты тас жолының ұзын бөлігін жауып тастаған.
Соның салдарынан 200-ге жуық адам көліктерін тастап кете алмай, екі күн қатарынан жол бойында түнеген. Оқиға орнында құтқарушылар жұмыс істеп жатыр. Көліктерде қамалғандарға тамақ, ауыз су және көрпе жеткізілді. 200 жолаушының 12-сі ауруханаға жеткізілді.
Жапон теңізі жағалауы маңындағы кей жерлерде ақ ұлпаның биіктігі 1 метрден асады. Кей аудандарда жарық сөніп қалған. Сондай-ақ қар көшкіні қаупі күшейген. Ал ауа райын болжаушылар қазіргі күн райы ертеңге дейін сақталатынын ескертіп отыр.
Синоптиктердің болжауынша, Тохокудың солтүстік-шығыс аймағында келесі күні 40 см-ге дейін қар жауады. Билік бірнеше пойыздың қозғалысын тоқтатты.
Жапонияның Премьер-министрі Ёсихидэ Суга тұрғындарды сақ болуға шақырды.
Дайындаған
Рабиға НҰРҒАЛИ