Жарлыны байланыс желісімен жарылқады

Аталған елді мекен облыс орталығынан 255 шақырым шал­ғайда орналасқанын ескерсек, ауыл халқы ұзақ жылдан бері сапалы интернеттен таршылық көріп келді. Ұлттық оператордың ақпаратына сүйенсек, алғаш рет Жарлыға интернет 2015 жылы EV-DO технологиясы арқылы тар­тылған еді. Алайда оның жыл­дамдығы 512 килобит секунд­тан ары аспай, оны тек 1189 ауыл тұр­ғынының 12-сі ғана пайдаланған.

«Бүгінде EV-DO технология­сы ескірген, ал оның көптеген бөлшегі қазір шығарылмайды. Ин­тернет жылдамдығының тө­мен­дігіне қарамастан, бұл қыз­метке ауыл тұрғындарының сұ­ранысы жоғары еді. Сол се­бепті ауылдағы интернетке қа­тысты мәселені реттеу үшін оң­тайлы шешім қабылдау керек болды», деді «Қазақтелеком» АҚ Орталық ӨТД В2С сегментінің коммерциялық директоры Дамир Сейсенбеков.

Былтыр ұлттық байланыс операторының филиалы Жарлы елді мекенін радиокөпір технологиясы арқылы 12 Мбит/с дейінгі жылдамдықты интернетпен қамтамасыз ету жөнінде техникалық шешім әзірлеп, қазір «Қазақтелеком» алғашқы 100 або­нентті сапалы интернетке қосып үлгерді. Нәтижесінде халық бар­лық заманауи телекоммуникация қызметін, оның ішінде онлайн сабақ, бейнеқоңырау және басқа да қызмет түрлерін пайдалану мүмкіндігін алды.

«Бұрын тек хабарлама ғана жолдай алатынбыз. Фото және бейнероликтерді жүк­теу қиынға соғатын. Таяуда «Қазақтеле­комның» қызметін қостық, сол ар­қылы әлеуметтік желілерді пайдалануды үйрендім. Қазір Telegram немесе Zoom арқылы қазақтың ұлттық қол өнері бо­йын­ша шеберлік сабақтарын кө­ріп жүрмін. Сүйікті ісім табыс әке­летін болса, бұл мен үшін ба­қыт», деді Жарлы ауылының тұр­ғыны Күлжан Алдашева.

Сонымен қатар аудандық әкім­діктердің қолдауымен Қа­ра­ғанды облысының 30 ауылына жоғары жылдамдықты мо­бильді интернетті пайдалануға мүмкіндік беретін қондырғы орнатылды. Бұл ретте аталған өңірдің елді ме­кендеріне жоғары жыл­дамдықты интернетті тар­туға Ауылдық елді мекендерге талшықты-оптикалық байла­ныс желісінің (АЕМ ТОБЖ) құры­лысына байланысты жалпы­ұлттық жоба септігін тигізгенін айта кеткен орынды. Осы жоба өңірдің 36 ауылындағы 120-дан астам мемлекеттік мекемені (әкім­діктер, мектептер, ауруханалар, полиция бөлімшелері) 10-нан бастап 100 Мбит/с дейінгі жыл­дамдықтағы интернетпен қам­тамасыз етуге мүмкіндік бер­ді. Аталған елді мекендердегі үй шаруашылықтарының телекоммуникация қызметтеріне қосылу саны 4 мыңға дейін өскен.

«АЕМ ТОБЖ», «250+» GPON технологиясы, радиоқосылу жобалары арқылы қалалар мен ауыл­­дар арасындағы цифрлы тең­сіздікті жою бағытындағы бас­ты міндетті шешіп келеміз. Енді Жарл­ы ауылының тұрғындарына да ірі қалалардағы секілді теле­ком­муникация қызметтері қол­жетімді. Халыққа анықтама және басқа да құжаттар алу үшін ауда­н орталығына барудың қажеті жоқ. Оның барлығын қашықтан алуға мүмкіндіктері бар», деді Д.Сейсенбеков.

Құрылған желілік инфрақұры­лымның негізінде  мобильді операторлар, «250+» жобасы аясында Қарағанды облысындағы 85 ауылды кең жолақты мобильді интернетке қосты. Ал FTTH және GPON технологиясы арқылы Қарағанды, Жезқазған, Балқаш, Шахтинск, Теміртау қалалары мен Осакаров кентінің 50 мың­нан астам тұрғыны цифрлы инфрақұрылымға қол жеткізді. Облыстың тағы екі қаласында, атап айтқанда, Саран және Абайда жаңа желімен 508 көп пәтерлі үйді қамту жоспарланып отыр.