Көпшілік сүйінген көркемөнер
<p style="text-align: justify;">Қазақтың бейнелеу өнері кеңес­тік идеологияның кісенінен босап шығысымен көп ұзамай, мың түрлі құлпырма бояуға қа­нығып үлгерді. Суретшілердің айтар ойынан тартып, оқырманға жеткізер әдіс-тәсіліне, танымы мен нанымына дейінгі аралық та мейлінше түрленді. Әрине, оның бәрі егемендігіміздің нәти­жесі. Осыған орай еліміздегі «TAMYR» шығармашылық тобы­ның көркемөнер көрмесінің сал­танатты ашылу рәсімі өтті.</p>
Аталған көрме Тәуелсіздігіміздің 30 жылдығына арналды. Халықаралық арт кеңістікте өнердің әртүрлі жанрларында жұмыс істейтін, өзінің қайталанбас дүниетанымы, жаңашылдығы бар дарынды суретшілердің мәртебесін көтеруді мақсат тұтқан іс-шара Ұлттық музейде ұйымдастырылды.
Алғашқы беташар сөзді Ұлттық музей директорының орынбасары Назгүл Кадримбетова алды.
«TAMYR» – көркемөнер рухын өз заманына сай кәсіби шеберліктері арқылы бейнелейтін суретшілердің бірлестігі. Өнерді мамандық ретінде емес, өмір салты ретінде қабылдағандар. Осы арада ағылшын жазушысы, суретші әрі өнертанушы Джон Рёскиннің жақсы сөзі есіме түсіп тұр. «Суретшінің қолы, қиялы және жүрегі бірге жұмыс істесе ғана тамаша сурет шығады». Бұл көрме де шебер қолды, қиялы ұшқыр, жүрегі кең суретшілеріміздің еңбектері мен құнды дүниелеріне толы», деді Н.Кадримбаева.
Ізгі тілектен кейін Қазақстанның еңбек сіңірген қайраткері, Суретшілер одағының мүшесі Абдуахат Мұратбаев осынау көрменің ұйымдастырылуына қолдау білдірген музей ұжымына алғысын білдіріп, көрмеде экспозицияланған жас буыннан бастап аға буынға дейінгі қылқалам шеберлерінің жұмыстары музей қонақтарының жүрегінен ерекше орын алатынына сенім білдірді.
Айта кетейік, «TAMYR» шығармашылық тобына елімізге танымал, өзіндік қолтаңбасы қалыптасқан Суретшілер одағының мүшелері кіреді. Олардың қатарында Насыр Рустамов, Мұрат Мансұров, Сұлтан Иляев, Абдуахат Мұратбаев, Расылбек Естемесов, Айнұр Асанова, Едіге Тұрлыбеков, Мұхтар Бекенов сынды қылқалам шеберлері бар. Шығармашылық топтың барлық өкілі кәсіби көркемдік білімге ие, беделді республикалық және халықаралық байқаулардың лауреаттары болып саналады. Қазақстан аумағымен қатар, шетелде де белсенді еңбектеніп жүрген авторлардың көркемөнер туындылары көптеген елдің жеке топтамаларында ұсынылған. Демек, бұл олардың көпжылдық еңбегінің жоғары деңгейде бағалануы.
Көрмеге 100-ден астам көркемөнер туындылары ұсынылды. Сондай-ақ көрме аясында «TAMYR» шығармашылық тобындағы танымал қазақстандық суретшілердің шеберлік сыныптары да өткізілді.