Алматы шетелдік блогерлерге 26 миллион теңге төлемек
<p style="text-align: justify;">Алматы қаласының Туристік ақпараттық орталығы шетелдік 20 блогерге бес күндік тур өткізбекші. Оған бюджет қаржысынан 26,7 миллионға жуық теңге бөлінеді, деп хабарлайды <a href="/" target="_blank" rel="noopener noreferrer">Egemen.kz</a>.</p>
Баспасөз-туры екі кезеңге бөлінген. Біріншісі биыл 2/3 тоқсанда, екіншісі 3/4 тоқсанда өткізіледі. Блогерлер Грузия, Армения, Беларусь, Ресей, Украина, Түркия, Корея, БАӘ және Гонконгтен шақырылады. Сондай-ақ бюджет есебінен олардың елге келу және кері қайту билеттері төленеді.
Блог-тур 40 елден келетін блогерлер мен миллионнан астам қаралым жинай алатын медиа-жеке тұлғаларды қамтиды, сонымен қатар 50 мың жазылушы аудиториясы бар микро-әсер етуші азаматтар шақырылады.
Департамент өкілдері шетелдік блогерлермен жұмыс жасау Қазақстан мен Алматыға келгісі келетін туристер ағынын көбейтеді деп үміттенеді.
Алматы қаласы бойынша шолу экскурсиясы мынадай:
-Қазақ халық музыкалық аспаптар музейі;
-Алматы музейі;
-28 Панфиловшылар паркі;
-«Көк-Төбе» паркі;
-Көк базар;
-«Сұңқар» трамплин кешені;
-«Гунны» этноауылы;
-Oi-Qaragai Lesnaya Skazka;
-Arba Wine жүзім алқабы;
-«Шарын шатқалы» мемлекеттік ұлттық табиғи паркі;
-«Шымбұлақ» тау шаңғы курорты;
-Медеу мұз айдыны;
-Көлсай көлі.
Сондай-ақ қазақтың ұлттық тағамдарын дайындау бойынша мастер-класс өткізіліп, ұлттық киіммен фотосессия жасауға қолөнершілер шеберханасына жеткізіледі.
Ведомство өкілдері блог-тур Алматы облысы аумағы мен қаладағы эпидемиологиялық жағдайды ескере отырып өткізілетінін айтты.