Ауғанстаннан есірткі тасымалдаған қылмыстық топ ұсталды
<p style="text-align: justify;">Ұлттық қауіпсіздік комитетінің қызметкерлері халықаралық есірткі арнасын жойды, деп хабарлайды <a href="/" target="_blank" rel="noopener noreferrer">Egemen.kz</a>.</p>
ҰҚК баспасөз қызметінің мәлімдеуінше, есірткі Қазақстанға Ауғанстаннан жеткізіліп отырған.
– Ұлттық қауіпсіздік комитеті прокуратура органдарының келісімі аясында жедел-іздестіру шараларын жүргізіп, Ауғанстаннан Қазақстанға апиын есірткісін контрабандалық жолмен тұрақты жеткізіп тұрған трансұлттық есірткі құрылымын анықтап, жолын кесті, - делінген хабарламада.
Алматыда 15 маусымда жүргізілген халықаралық арнайы операция кезінде есірткі трафигін ұйымдастырған азамат 25 келі есірткі тасымалдаған жерінен ұсталды. Анықталғандай, күдікті Ресейде осыған ұқсас қылмысы үшін іздеуде болған.
– Бұл адам қылмыстық жауапкершіліктен жалтару үшін Тәжікстан Республикасы азаматының жалған төлқұжатын пайдаланған. Сонымен қатар оның сыбайласы – Қазақстан азаматы ұсталды, - деді ведомстводағылар.
Тергеу материалдары Қылмыстық кодекстің 286-бабы 4-тармағы және 297-бабы 3-тармағы бойынша сотқа дейінгі тергеулердің бірыңғай реестріне тіркелді.
Есірткі акциясына қатысы бар өзге де адамдарды анықтау бойынша жедел тергеу шаралары жалғасуда.