Мемлекет басшысының маңызды бастамасы
<p style="text-align: justify;">Бейнеконференция форматында ҰҚШҰ Пар­ла­менттік Ассамблеясы Кеңесінің отырысы өтіп, онда Қазақстан Президенті Қасым-Жомарт Тоқаевтың бітімгершілік мәселелері бойынша ҰҚШҰ Бас хатшысының арнайы өкілі институтын құру туралы бастамасы талқыланды, деп хабарлады Мәжілістің баспасөз қызметі.</p>
Отырыста сөз сөйлеген Мәжіліс Төрағасы Нұрлан Нығматулин атап өткендей, Қазақстан жаһандық және аймақтық деңгейдегі өзекті мәселелерді шешу үшін халықаралық өзара іс-қимылды одан әрі тереңдетуге және нығайтуға ниетті. Себебі қазіргі уақытта аймақтық қауіпсіздік тақырыбының өзектілігі бұрынғыдан да арта түсті.
Мәжіліс Спикері ҰҚШҰ ұйымының бітімгершілік әлеуетін дамытудың маңыздылығына баса назар аударды. Осы ретте, Қазақстан Президенті Қасым-Жомарт Тоқаевтың бітімгершілік мәселелері бойынша ҰҚШҰ Бас хатшысының арнайы өкілі институтын құру туралы бастамасын жүзеге асыру Ұйымның БҰҰ тиісті құрылымдарымен өзара іс-қимыл мүмкіндігін кеңейтетіндігін алға тарта келе, Нұрлан Нығматулин бұл институт осы саладағы өзекті мәселелерді жаңа сапалық деңгейде шешуге, сонымен бірге БҰҰ бітімгершілік әлеуетін арттыруға жол ашатынына сенім білдірді.
Отырыста сондай-ақ Тәжікстанның 2021 жылы ҰҚШҰ төрағалығы, ҰҚШҰ аясында қол жеткізілген ҰҚШҰ әріптестік мәртебесіне, Қазақстанда, Арменияда, Қырғызстанда өткен сайлауларда ҰҚШҮ ПА атынан қатысқан халықаралық байқаушылар тобы жұмыстарының қорытындысына қатысты халықаралық келісімдер төңірегінде әңгіме өрбіді.
ҰҚШҰ ПА Кеңесі Ассамблея қызметін ұйымдастырады, оның құрамында Қазақстан, Армения, Беларусь, Қырғызстан, Ресей және Тәжікстан елдері Парламенттерінің басшылары бар.