Өңірлік дағдарыс орталықтарын дамытады

Бұл жоба Qolda 3.0 жедел кө­мек бағдарламасы аясында «Шеврон» компаниясы, Орта Азия-Еуразия қоры және «Заң та­лабы» қоғамдық қорымен әріп­тестікте іске асыры­луда. Жобаны «Қазақстандағы тең құқық пен тең мүмкіндік инс­­титуты» қоғамдық қорының пре­зиденті және өңірлік дағдарыс орталықтарының се­рік­тесі Мар­гарита Өскембаева қолдады.

Аталған жоба COVID-19 пандемиясынан болған карантин кезінде Қазақстандағы әйелдер мен балаларға қатысты тұрмыстық зорлық-зомбылық жағдайларының артуына байланысты жауапты шара ретінде қолға алынды. Жо­баға дағдарыс орталықтарының қызметкерлері, психологтер мен заңгерлер қатысады. Олар зорлық-зомбылық құрбандарына көмек көрсетудің тиімді технологияларын үйренеді. Атап айтқанда, психологтер «Психологиялық мәселелердің барлық түрлерін шешуге арналған авторлық Genesis экспресс-пси­хотерапиялық бағ­дар­ламасынан өтеді. Бұл тәсіл пси­хологтерге психологиялық жарақат алған­нан кейін психологиялық дағ­дарысқа ұшыраған ересектерге, жасөспірімдерге және балаларға дер кезінде көмек көрсетуге мүм­кіндік бермек. Аталған әдіс пси­хо­логиялық, физикалық, жы­ныс­тық зорлық-зомбылыққа ұшы­раған адамдарға көмектеседі.

Қор зорлық-зомбылыққа қарсы күрес жүргізетін ұйымдармен танысу, қатысушыларды ынталандыру және жобаның мақсаттарын талқылау мақсатында жуырда Ыстықкөл жағалауында оқыту турын ұйымдастырды. Топпен бірге Маргарита Өскембаева мен өңір­лік дағдарыс орталықтарының бас­шылары да қатысып, жоба тре­­нерлері Genesis экспресс-пси­хо­­­терапиялық тәсілі бойын­ша ше­берлік сабақтар мен психо­ло­­гиялық мәселелердің барлық тү­рін шешу үшін тренинг-интенсив өткізді.

Жоба тренері Жанар Даненова оқу нәтижелерін бөлісіп, зорлық-зомбылық құрбандарына көр­се­тілетін қызметтердің сапасын жақ­сарту мақсатында дағдарыс ор­талықтарының психологтері мен заңгерлерінің біліктілігін арт­тыр­ғысы келетіндерін жеткізді. Сон­дай-ақ шеберлік сабақтарға қатысу­шылар экспресс-тәсілдің мүмкіндіктерімен таныса алды. Бір сеанстан кейін олар өздерін жылдар бойы мазалаған жағымсыз эмоциялар мен тәжірибелерден арыла алды. Genesis тәсілінің қан­ша­лықты мақсатты және жеңіл түр­де психотерапиялық интервенция өт­кізе алатыны – таңғаларлық нәтиже.

«Бағдарламаға қатысқаныма қуаныштымын. Мұнда оқығаным және бастан кешіргенім біздің қор моделімен тығыз байланысты: біз қиындыққа тап болған отбасылармен, зорлық-зомбылықтың құрбаны болған ересектермен және балалармен айналысамыз. Осы тәсілдің көмегімен біз адам­дарға проблемаларын өз беттерімен шешуіне ықпал ете аламыз» деді тренингке қатысушы, алматылық «Береке» қорының жетекшісі Бағдаш Сүлейменов.

Оқыту туры барысында Мә­жіліс депутаты Ирина Смир­но­вамен кездесу өтті, онда аймақ­тық дағдарыс орталықтарын дамыту мәселелері талқыланды.

Verum Foundation қоры қоғам­ның әлеуметтік-психоло­гиялық сауығуына ықпал ету мақ­сатында құрылған. Сонымен қатар қор өз алдына психологиялық денсаулық индустриясын дамыту және пси­хологиялық көмекті дәріптеу мін­деттерін қойып отыр. Қордың не­гізгі қызметі – ха­лық­қа және пси­хологтерге білім беру, психология, психотехнология, психиатрия және басқа да бай­ла­нысты пәндер бойын­ша маман­дан­дырылған кәсіби курс­тар өткізу.