Өскемен әуежайы ашылды
<p style="text-align: justify;">Жарты жылға жуық өске­мендіктер Семеймен екі ортада сабылысып қал­ған. Өскемен әуежайы жөн­деуге жабылып, ұшақ­тар қарт қаладағы Абай әуежайынан ұшып-қо­нып жатты. Көңілі күпті халық Ертістің көпіріне ұқ­сап сағызша созылмаса екен деп те тілеген. «Көп тілегі көл». Уақтылы аяқ­талып, 1 қазаннан бас­тап іске қосылды.</p>
Ашылған күні-ақ облыс орталығынан Нұр-Сұлтан, Алматы қалаларына ұшақтар ұшты. Ағымдағы жылдың мамыр айынан бастап Өскемен әуежайы «Нұрлы жол» мемлекеттік бағдарламасы аясында ұшу-қону жолағының күрделі жөнделуіне байланысты жабылды. Ұшу-қону жолағын ұзарту және кеңейту бойынша жұмыстар жүргізілді.
– Мердігерлер ұшу-қону жолағындағы асфальт-бетон жабынын толығымен алмастырып, оны ұлғайту жұмыстарын жүргізді. Енді ұзындығы 2 800 метр, ені 60 метр. Мұндай параметрлер әуежайға халықаралық рейстердің үлкен лайнерлерін қабылдауға мүмкіндік береді. Сондай-ақ жолаққа жарық сигналдық жабдықтың жаңа заманауи жүйесі орнатылды, – дейді «Өскемен әуежайы» АҚ президенті Николай Короленко.
Әуежай басшысының айтуынша, соңғы рет осындай ауқымды жұмыстар облыс орталығының әуе айлағында 1996 жылы жүргізіліпті. 25 жылға жуық күрделі жөндеу жүргізілмеген айлақ әбден ескірген. Сондықтан да жөндеу жұмыстары жедел түрде қажет болды. Барлық жұмыстар аяқталған соң арнайы комиссия қабылдады. Құрамына жол құрылысы мамандарымен қатар, Азаматтық авиация комитетінің өкілдері де болды.
Айта кетсек, тексеру жұмыстары 15-21 қыркүйек аралығында жарық сигналдық және аэронавигациялық жабдықтар жүйесінен басталды. Қазіргі уақытта Air Astana, SCAT және Qazaq Air авиакомпанияларының үш бағыттағы, яғни Нұр-Сұлтан, Алматы және Қарағанды рейстері жаңартылуда. Жақын арада бағыттар саны да, облыс орталығына және одан ұшатын авиакомпаниялар саны да артады.
Ал әуежайдың жүк әлеуетін арттыру үшін биыл 30 тонналық жүк терминалы мен сыйымдылығы 100 тонна уақытша сақтау қоймасының құрылысын аяқтау жоспарда бар. Мұндай шаралар өткізу қабілетін жақсартуды қамтамасыз етеді және жүк авиатасымалдарын дамытуға мүмкіндік береді.