«Тобыл» – чемпион!

Чемпиондықтың тағдыры соңғы турда шешілді. Өткен аптаға дейін «Астана» мен «Тобыл» турнир кестесінде бір-бірін өкшелеп келсе де, бар мә­селе 26-турда шешілді. Ел чем­пионы атанған «Тобыл» соңғы тур ойынын Оралдың «Ақ­жайық» ұжымымен өткізді. Сырт алаңда қарсыластарынан 2:0 есе­бімен басым түскен Александр Мос­каленко шәкірттері осылайша ел чемпионы атанды.

Кездесудің 28-минутында «То­был» шабуылшысы Игорь Сергеев командасын алға шығарды. Ас­хат Тағыбергеннің алыстан жа­саған соққысын «Ақжайық» қақ­пашысы қайтарғанымен, кейін серпілген допқа бірінші жеткен өзбекстандық шабуылшы допты қақ­паға тоғытты. Ал 60-минутта Асхат Тағыбергеннің өзі жеңісті голды соғып, ойынның нүктесін қойды. Осылайша, 26 ойында 61 ұпай жинаған «Тобыл» чемпион атанды. Біріншілік барысында «Тобыл» 18 рет жеңіске жетіп, 7 рет тең ойнады. Тек бір ойында ғана («Каспий – 2:1) жеңілістің кермек дәмін татты.

Ал соңғы сәтке дейін «Тобыл­мен» бірге чемпиондыққа талас­қан «Астана» 25-турда сырт алаң­да «Қайраттан» жеңіліп, чем­пионаттағы жағдайын қиындатып алса, соңғы турда турнир кес­тесінде 12-орында келе жатқан Түркістанның «Тұранымен» тең ойнады. Екі ойында бір-ақ ұпай жинаған «Астана» осылайша чемпиондық атақты «Тобылға» беріп қойды.

«Астана Аренада» өткен ойында алаң иелері бірінші тайм­ның 11-минутында гол соғып, есепте алға шықты. Голдың авторы – Макс Эбонг. Алғашқы 45 минутты сәтті аяқтап, екінші таймда да елордалықтар тәуір ойын көрсетіп жатқан еді. Алайда 78-минутта «Астананың» молдовалық легионері Валерий Чуперка қы­зыл қағазбен алаңнан қуылып, ко­мандасын қиын жағдайда қал­дырып кетті. Арада 2 минут өткен соң «Астананың» бұрынғы ойын­шысы, қазіргі «Тұранның» капитаны Таңат Нөсербаев гол со­ғып, таразы басын теңестірді. Қо­рытынды есеп – 1:1.

Чемпионатты тең ойынмен бастап («Тұран» – 2:2), тең ойынмен аяқтаған «Астана» 26 ойыннан кейін турнир кестесінде екінші орынға табан тіреді. 17 матчта жеңіске жетіп, 6 ойында тең түсіп, үшеуінде жеңілген елордалық ұжым 57 ұпай жинады. Былтырғы бі­ріншілікте қола жүлдеге қол жеткізген «Астана» биыл күміс жүлде иеленді.

Сонымен қатар чемпионаттың тағы бір маңызды ойыны Пе­тро­павлда өтті. Жергілікті «Қызыл­жар» командасы өз алаңында Шым­кенттің «Ордабасы» ұжы­мын қабылдап, турнир кесте­сін­де төртінші орынға кім ла­йық екенін анықтады. Турнир кес­тесінде онсыз да 4-орында тұр­ған «Ордабасыға» бұл ойында тең нәтиже де жетіп жатыр еді. Матчтың 90-минуты басталғанға дейін шымкенттіктер алаң қо­жайын­дарымен терезесі тең ойын көрсетіп (2:2), өз міндеттерін ла­йықты орындап жатқан болатын. Бірақ төреші қосқан қосымша минутта «Қызылжар» ойыншысы Пабло Подио бұрыштама кезінде бас­пен гол салып, жергілікті жан­күйерлерді қуанышқа бөледі – 3:2.

Осы жерде ешқандай жүлдесі жоқ төртінші орынның қандай маңызы бар деген заңды сауал туындайтыны анық. Біріншілік ережесі бойынша, егер Қазақстан кубогында чемпионаттағы ал­ғашқы үш орынды иеленген коман­даның бірі топ жаратын болса, Еурокубок ойындарына берілетін жолдама автоматты түрде чем­пионатта төртінші орын алған ко­мандаға беріледі. Ал қазір кубок ойынының жартылай финалына «Тобыл», «Астана», «Қайрат» және «Шахтер» клубтары шыққан. Егер «Шахтер» Қазақстан кубогын ие­ленетін болса, онда турнир кес­тесінде төртінші орын алған ко­манда бәрінен құр қалады. Ен­ді «Қызылжар» жанкүйерлері Қазақ­стан кубогының аяқталғанын күтеді.

26-турдың өзге де ойында­рының нәтижесі мынадай: «Қай­рат» – «Жетісу» – 0:0, «Ақтөбе» – «Каспий» – 1:5, «Тараз» – «Қайсар» – 1:2, «Шахтер» – «Атырау» – 3:1.

Тұңғыш рет Премьер-лигада

Биылғы ел біріншілігінің қорытындысы бойынша ең нашар ойын көрсеткен екі ұжым – «Қай­сар» мен «Жетісу» жоғары топтан төменгі топқа түсіп қалды. Енді екі клуб қайтадан Премьер-лигаға шығу үшін келесі жылы Бірінші лигада үздіктер қатарынан көрінуі керек. Ал төменгі топта алғашқы екі орынды иеленген Павлодар облысының «Ақсуы» мен Түркістан облысының «Мақтааралы» енді Премьер-лигада «Қайсар» мен «Жетісудың» орнын басады. Бір айта кетерлігі, бірі 2012 жылы («Мақ­таарал»), екіншісі 2018 жылы («Ақсу») құрылған екі клуб та өз тарихында тұңғыш рет Премьер-лигаға жолдама алып отыр. «Мақтааралдың» 2017 жылы жоғары топта ойнайтын мүмкіндігі болған еді. Алайда електік ойында «Тараздан» жеңіліп, Премьер-лигадан тыс қалды.

Дегенмен «Мақтааралдың» келесі жылғы чемпионаттағы тағдыры қыл үстінде тұр. Себебі Бірінші лигада өнер көрсететін «Оқжетпес» клубынан федерация шешімі бойынша 9 ұпай алынған. Егер клуб федерация алдындағы мін­деттерін толық орындайтын болса, онда «Оқжетпес» қайтадан Премьер-лигаға оралуы мүмкін.

Чемпионат қорытындысы бо­­йынша, жылдың үздік сұр­мер­гені болып «Астананың» хор­ватиялық легионері Марин То­масов танылды. Ол маусым бойы қарсыластар қақпасына 17 гол соқты. Екінші орын «Қайрат» ша­буылшысы Артур Шу­шеначевке бұйырса (12 гол), үздік үштікті «Тобылдың» ойын­шысы Игорь Сергеев (10 гол) түйіндеді.