Бекіреге белгі қойды
<p style="text-align: justify;">Ақтау қаласын көркейту – күн тәртібіндегі мәселе. Осы орайда қала тұрғындары мен қонақтары көп серуендейтін теңіз жағалауынан әртүрлі нысандар ашу жұмыстары жүр­гізіліп келеді. Жуырда демеушілік қаражат есебінен жеке кәсіпкер MasterMind командасының күшімен жағалауға «Бекіре» кіші архитектуралық нысаны орнатылды.</p>
Нысанның ұзындығы 13 метрді, биіктігі 1,9 метрді құрайды. Бекіренің жақтауы металдан, сыртқы бөлігі өз технологиясына сәйкес арматураланған шыны матаны қолдана отырып жасалған. Дизайн полиэфир шайырымен қорғалған, көркем кескіндеме майлы бояумен жасалған және арнайы лакпен қорғалған.
Теңіз жағалауына бекіре инсталляциясының идея авторлары орналастырылу себебін бұл балық түрінің дүние жүзіндегі жалпы көлемінің 80%-дан астамы ХХ ғасырдың бірінші жартысында Каспий аумағын мекендегендігімен түсіндіреді. Қазір бұл түр шектен тыс өнеркәсіптік аулау салдарынан жойылу алдында тұр. 2001 жылы Каспий алабындағы төрт ел – Қазақстан, Ресей, Әзербайжан және Түрікменстан бекіре тұқымдас балықтарды аулауға уақытша мораторий қабылдады. Мораторий Біріккен Ұлттар Ұйымының ұсынымымен жойылу қаупі төнген түрлердің халықаралық саудасы туралы Конвенция негізінде енгізілген.
Көптүсті мүсін нақышында жасалған және көркем кескіндемемен безендірілген бұл инсталляция бірегей жануарлар әлеміне қамқорлықпен қараудың маңыздылығының нышаны ретінде орнатылды.
Маңғыстау облысы