ІТ жүйесінде білімдерін жетілдірді
<p style="text-align: justify;">Қазақ ұлттық қыздар педа­го­гикалық университетінің сту­дент­­тері академиялық ұтқыр­лық бағ­дарламасы ая­сында Рига тех­никалық универси­т­етінің Ақпа­рат­тық жүйе­лер менеджменті жоға­ры мектебінде білімдерін жетіл­дір­ді. Физика, математика және цифрлық технология­лар инст­итутының білім алушылары бір семестр көлемінде еуропалық білім беру стандартына негізделген оқу жүйесімен та­нысуға мүмкіндік алды.</p>
Биылғы оқу жылында Қазақ ұлттық қыздар педагогикалық университетінің 17 білім алушысы академиялық ұтқырлық және қос дипломды білім беру бағдарламалары бойынша шетелдің іргелі жоғары оқу орындарында білімдерін жетілдірді. Атап айтқанда, «Информатика» мамандығы бойынша білім алатын студенттер Латвияның Менеджмент және ақпараттық жүйелер Жоғары мектебінде, «Шетел тілі: екі шет тілі», «Аударма ісі» мамандықтары бойынша білім алатын студенттер мен магистранттар Польшаның Силез Университетінде, «Химия», «Биология», «География» мамандықтары бойынша білім алатын студенттер Түркияның Нийде Өмер Халисдемир университетінде академиялық ұтқырлық және қос дипломды білім беру бағдарламалары бойынша біліктілігін жетілдірмек.
Қазіргі таңда университетте шетелдік жоғары оқу орындарымен 70-тен астам халықаралық шарт жасалған. Академиялық ұтқырлық бағдарламасын іске асыру мақсатында әлемнің 9 жоғары оқу орнымен келісім орнатылған. Олардың қатарында АҚШ, Түркия, Франция, Ұлыбритания, Польша, Оңтүстік Корея, Ресей сынды елдердегі жетекші университеттер бар. Университет интернационаландыруды дамыту мақсатында АҚШ-тың Миссисипи алқабының мемлекеттік университетімен, Польшаның Силез университетімен және Ресейдің Томск политехникалық университетімен қос дипломды білім беру бағдарламаларын іске асырып отыр.
– Академиялық ұтқырлық бағдарламасы студенттер үшін үлкен тәжірибе алаңы. Осы бағдарлама арқылы шетелдік білім жүйесімен, өзге ұлттың мәдениетімен танысуға, өмірге деген көзқарасымызды жақсарта түсуге мүмкіндік туды. Ең бастысы, еліміздегі білім жүйесіне жаңа көзқарастар, жаңа идеялар алып келдік деп ойлаймын. Университетіме осындай мүмкіндік бергені үшін алғыс айтамын, – дейді «6B01506-Информатика» мамандығының 3-курс студенті Аружан Естөре.
АЛМАТЫ