Білім платформасындағы онлайн оқу

Жуырда Астана қаласында Digital Bridge 2022 Халықаралық форумы барысында «Еңбек ресурстарын дамыту орталығы» АҚ президенті Дәулет Арғындықов және Coursera Еуропа елдеріндегі үкіметтермен өзара іс-қимыл жө­ніндегі басшысы Алина Леон-Козенко тиісті меморандумға қол қойған болатын.

«Ынтымақтастық туралы ке­лісім еңбек ресурстарының білімі мен дағдыларын арттыру үшін мүмкіндіктерді кеңейтуге, оның ішінде платформаларды интеграциялау арқылы бағытталады. Coursera және Skills Enbек алаң­дарында онлайн-оқыту қазақстандықтарға өз біліктілігін арт­тыруға, жаңа дағдылар алуға және өздері үшін жаңа салада мансапты бастауға мүмкіндік береді», деп хабарлады Дәулет Арғындықов.

«ЕРДО» АҚ маркетплейс қағидаты бойынша курстарға қолжетімділік беретін халық­аралық алаңдардың қазақстандық баламасы болып саналатын Skills Enbek онлайн-оқыту платформасын техникалық және әдіс­намалық дамытуды жүзеге асырады.

Кез келген адам Skills-те оқу­ды бастай алады, ал платфор­мада алынған сертификаттар мен дағдылар түйіндемеде Элек­трон­дық еңбек биржасында автоматты түрде көрсетіледі. Плат­форма 2021 жылы іске қосылды және оны дамыту, курстардың саны мен сапасын арттыру тұрақ­ты негізде жүргізілуде.

Бүгінгі таңда Skills Enbek-те 109 кәсіп бойынша 157 курс орналастырылған, оның 72-сі тегін. Тіркелген пайдаланушылар саны 155 мыңнан астам адамға жетті, ал оқуды сәтті аяқтап, 119 мың адам сертификат алды. Оқу­ды аяқтағандардың ішінен 22 мың адам жұмыссыз тұлға мәртебесіне ие.

Coursera-мен ынтымақ­тас­тықты құру қазақстан­дық­тарға қол­жетімді курстар базасын кеңейтуге және оған қолже­тімді­лікті жеңілдетуге мүмкіндік бе­реді.

Coursera білім беру платформасы – адамдарға заманауи білім мен өзекті дағдыларды беру мақ­сатында әлемнің 250-ден ас­там жетекші университеттері мен технологиялық алыптарды бірік­тіретін әлемдегі ең ірі білім беру ұйымы. Жыл сайын Coursera-да әлемнің 200 елінен 100 млн-нан астам адам оқиды. Қазіргі уақытта платформада 6 мыңнан астам курстардан, 700 мамандықтан, сондай-ақ жобалық оқытудың 3 мың интерактивті ресурстарынан тұратын әлемдегі ең ірі білім беру бағдарламаларының кітапханасы ұсынылған.