Жастар бәсекесі
<p style="text-align: justify;">Қызылордада облыстық «Жастар ресурстық орталығы» КММ ұйымдастыруымен «Syr Jastary» атты веложарыс өтті. Республика күніне орай жастар мен жасөспірімдер арасында бұқаралық спортты насихаттап, саламатты өмір салтын қалыптастыру мен велоспортты дамытуды көздеген сайысқа 50-ге жуық жас қатысты.</p>
Облыстық «Жастар ресурстық орталығы» КММ директоры Талғат Оспанұлы барша қатысушыларды ұлттық мерекемен құттықтап, сайысқа сәттілік тіледі.
«Болашақ» университеті жанынан басталып «Эдельвейс» айналма жолынан мәреге қайта оралған 20 шақырымдық топтық сайысқа №3 облыстық веломектебі бекіткен төрешілер алқасы қазылық етті. Сайыс қорытындысына сәйкес, жеңіс тұғырының бірінші орнына Асылхан Тұрар көтерілсе, II орын жүлдесін Саят Айдархан иеленді. Үздік үштік қатарын Диас Тұрат түйіндеді.
Қыздар арасында Әлия Өтеген I орынды иеленсе, Ғалия Қуатбаева екінші, Інжу Асылбек үшінші орын иесі атанды.
Жарыс жеңімпаздары мен жүлдегерлеріне облыстық қоғамдық даму басқармасы Жастар ресурстық орталығының дипломдары, арнайы медальдары және қаржылай сыйлықтары табысталды.
Жалпы, облыстағы мерекелік іс-шараларға жастар үлкен үлес қосты. Аймақта бір мезетте 40 мыңға жуық адам Мемлекеттік Әнұран орындап, «Патриотизм дауысы» деп аталған осы іс-шараға өңірдегі мектептер мен оқу орындарының шәкірттері қатысты. Одан бөлек, қала орталығындағы «Арай Сити Молл» сауда үйінде жастардың қатысуымен концерттік бағдарлама ұйымдастырылады.
ҚЫЗЫЛОРДА