Отбасы институтын жаңғырту маңызды
<p style="text-align: justify;">Президенттікке кандидат Қарақат Әбден Шымкент қаласындағы «АГФ Групп» тігін фабрикасының ұжымымен кездесті. Кездесу барысында кандидаттың бағдарламасы таныстырылып, қоғамдағы өзекті мәселелер талқыланды.</p>
Тігін фабрикасы ұжымының басым көпшілігі әйелдер қауымы болғандықтан олардың тарапынан кандидат ұсынған аналарды, көпбалалы отбасыларды қолдау және ұлттық құндылықтарды дәріптеуге қатысты іс-шараларға баса мән берілді.
«Отбасы мен аналардың әлеуметтік мәселелері – ел экономикасының дамуын көрсететін бірден-бір көрсеткіш. Менің сайлауалды бағдарламамда бұл сұрақтарға көп көңіл бөлінген. Әрбір отбасы, әсіресе көп балалы отбасының рухани-өнегелік әлеуеті зор, сондықтан ол халықтың ғасырлар бойы жинақталған ұлттық құндылықтарын сақтап, ұрпақтан-ұрпаққа жеткізетін маңызды ұғым болып табылады. Қазіргі кезде отбасы институтын жан-жақты нығайту, оның мәртебесін арттыру, көпбалалы аналарға қолдау көрсету ерекше маңызды», деді Қ.Әбден.
Кездесуге ОБСЕ байқаушылар миссиясының өкілдері Кристофер Маккалоу мен Кристина Богданова қатысты. Олар үгіт-насихат науқанының барысымен, Қарақат Әбденнің сайлауалды штабтарының жұмысымен танысты.
Айта кетейік, кандидат Қ.Әбден осы уақытқа дейін 8 облыста 30-дан астам кездесу өткізді.