Дайындықтың дер шағы
<p style="text-align: justify;">Отандық шаруалар алғаш рет көктемгі егіске дайындық қаражатын ерте алып отыр. 2023 жылдың егін егу жұмыстарын жүргізуге Аграрлық несие корпорациясы 23 млрд теңге бөлді. Енді шаруашылықтар көктемге ерте қамданатын болады.</p>
«Кең дала» бағдарламасын іске асыруға негізінен несие серіктестіктері белсенді қатысады. Солардың бірі – «Целиноград» несие серіктестігі. Серіктестік Ақмола облысының шаруаларын 940 млн теңгеге қаржыландырды. Қаржы ұйымының басшысы бұл қаражат 2023 жылғы егіс науқанын тиімді жүргізуге мүмкіндік беретінін жеткізді.
– Шаруалар жыл сайын «Кең дала» бағдарламасы бойынша дайындық қаражатын көктемде алатын. Бұл тиімсіз еді. Биыл, біріншіден, қаржыландыру көлемі ұлғайды, екіншіден, егін салушылардың мүддесін ескере отырып, корпорация несие шартына өзгеріс енгізді. Енді шаруа қожалықтары егін егу жұмыстарына қажетті ақшаны желтоқсан айында алып, тұқым, жанар-жағармай, тыңайтқышты биылғы бағамен сатып ала алады. Тәжірибе көрсеткендей, көктемге қарай баға 10-15 пайызға көтеріледі, – дейді «Целиноград» несие серіктестігінің басқарма төрағасы Сағадат Әшебеков.
Былтырғы макроэкономикалық жағдайды, егіс және егін жинау науқанындағы шығындардың артуын, осы саладағы несие қаражатына сұраныстың жоғары екенін ескере отырып, мемлекеттен қосымша 70 млрд теңге бөлінген болатын
– Аграрлық несие корпорациясының қолдауымен былтырғы 5,2 млн гектар егістік жер өңделді. Қаражаттың бір бөлігі – 23 млрд теңге 2023 жылғы егіс жұмыстарын қаржыландыруға бағытталған. Аграрлық несие корпорациясы ауыл шаруашылығы тауарын өндірушілерді қаржыландыру үшін өз қызметін жетілдіруді жалғастырады, – деді «Аграрлық несие корпорациясы» АҚ басқарма төрағасы Алмат Әшірбеков.
Қаржының ерте бөлінгенінің нәтижесінде Түркістан облысындағы «Ай» шаруа қожалығы көктемде егетін тұқымды сатып ала бастады. Шаруашылық өкілі Бағдат Айбосыновтың айтуынша, бұл шаруаларға ақша үнемдеуге мүмкіндік береді.
– Күздік дақылды егіп қойдық. Көктемде 800 гектар жерге бидай, арпа, мақсары және жоңышқа егуді жоспарлап отырмыз. Тұқымын қазір сатып алып жатырмыз, көктемде әлдеқайда қымбатқа түседі. Сондықтан несиенің қазір берілгені жақсы. Көктемге ауыл шаруашылығы техникасын, 25 тонна жанар-жағармай дайындадық. Наурыз айында егін егуді бастаймыз, – деді «Ай» шаруа қожалығының өкілі Бағдат Айбосынов.
Биыл көктемгі егіс және егін жинау жұмыстарын жүргізуге бөлінетін қаржы көлемі 140 млрд теңге болады деп жоспарланып отыр.