Ауыл мектептеріне – 28 автобус
<p style="text-align: justify;">Ұлыстың ұлы күні қарсаңында келген автобустарды өңірдегі аудандық білім бөлімдерінің басшылары қабылдап алды. Маңдайында «Балалар!» деген жазуы бар су жаңа сары автобустар шалғай ауылдарда тұратын оқушыларды мектепке таситын болады.</p>
Жаңа автобустардың бәрі жылдамдық шектегішпен, қауіпсіздік белдіктерімен және кондиционермен жабдықталған. Тіпті ерекше балаларға арналған пандустар мен жүргізушіні шақыратын түймелеріне дейін бар.
Облыстық білім басқармасының мәліметінше, өңір мектептеріне күн сайын 2,5 мыңнан астам оқушы арнайы бөлінген автобустармен қатынайды. Білім мекемелерінің автопаркі де жыл сайын жаңартылып, толықтырылып отырады. Мәселен, соңғы екі жыл ішінде облыстық бюджет есебінен 322 млн теңгеден астам қаржыға 9 автобус және 12 шағын автобус сатып алынған.
Автобустарды тапсыру рәсімінде Мемлекет басшысының қала мен ауыл арасындағы алшақтықты қысқарту жөніндегі тапсырмасының орындалу барысы да сөз болды. Білім басқармасы өкілдерінің айтуынша, 2025 жылға дейін өңірде 407 ауылдық мектепті жаңғырту жоспарланған. Оның 81-і биыл жүзеге асырылады. Сондай-ақ соңғы екі жыл ішінде 12,9 млрд теңгеге 193 білім нысаны жөндеуден өткен. Биыл 138 мектепке жөндеу жүргізілмек. Оған 3 млрд теңге қарастырылып отыр. «Жайлы мектеп» ұлттық жобасы аясында да бітетін шаруа көп. Мәселен, 2025 жылға дейін қалалық және ауылдық мекендерде 7500 орындық 9 мектеп салынбақ.
Қостанай облысы