Мемлекеттік тілдің саясы
<p style="text-align: justify;">Қазақстан халқы Ассамблеясының басқосуы бұрынғыдан өзгеше өтті. Алғашқы пленарлық отырыста республиканың түкпір-түкпірінен келген делегаттар әртүрлі проблеманы ашық түрде, жан-жақты талқылады. Сондай-ақ ұсыныс, тілектерін де жеткізді. Сол жиында көптің көңілін күпті еткен мәселелер Президент Қасым-Жомарт Тоқаевтың қатысуымен өткен Қазақстан халқы Ассамблеясының XXXII сессиясында өз шешімін тапты.</p>
Ең өзекті түйткілдің бірі – мемлекеттік тіл. Ұлыс өкілдері қазақ тілін білуі керек. Ол үшін тарихпен ізін жалғап келе жатқан қазақтың салт-дәстүрлерін, болмысын, танымын, ділін білу қажет. Бұл – бірліктің бастауы. Бүгінде елімізде 40 Достық үйі алаңы бар. Ол жерде мемлекеттік тілді үйрететін арнайы курстар ашылған. Этносаралық қарым-қатынасты нығайту үшін, тұрақтылықты сақтау үшін барлығымыз бір халық болып жұмылуымыз қажет.
Ассамблеяның ауқымды желісі қоғамда тұрақтылықты қамтамасыз етіп, Президент реформаларының жүзеге асырылуына сеп болуға әлеуетті. Себебі этномәдени бірлестіктер жергілікті әлеуметтік жағдайды жақсы біледі. Жыл сайын Қазақстан халқы Ассамблеясының сессиясында әр аумақтан этномәдени бірлестіктердің өкілдері, Ассамблеяның мүшелері жиналып, ой-пікірін ортаға салады. Біз ел арасындағы бірлігімізді нығайту, алға қойған мақсаттарға жету сынды мәселелерді талқылап, нақты бағытымызды айқындаймыз.
Біз өскелең ұрпаққа татулық пен бейбітшілікте өмір сүру қаншалықты маңызды екенін ұғындыруымыз керек. Себебі онсыз болашағымыз бұлыңғыр болмақ. Иә, басқа да экономикалық мәселелер баршылық. Бірақ ең басты байлық – бірлік. Бірлік болмай, тірлік болмайды. Жүктелген міндет пен ойлаған жоспар көп. Президенттің маған білдірген сенімін ақтауға еліме, жеріме қызмет етуге дайынмын.
Акбаржон ИСМАИЛОВ,
Қазақстан халқы
Ассамблеясы төрағасының орынбасары