Қалдықтан құрақ құраған
<p style="text-align: justify;">Егер жазушы оқырманын, суретші көрерменін селт еткізіп, ой салмаса – ол туынды өміршең бола ала ма? Ендеше, оқырман осы жолы қоғамның көкейкесті мәселелерін суретімен сөйлететін Сәуле Сүлейменованың полиэтилен, целлофан пакеттерден жасалған «Шыңжаңды тазалау», «Қандастар туралы дастан» сериясына қалың қағазға балауызбен басылған «I love you», «Sunset Workers», «Kazakh cancan», «Green Bus», «Barakholka» сериясындағы «Bazar Busstop-1» туындыларына зер салып көріңізші.</p>
Өзіндік мәнері бар автор қазіргі таңда сұранысқа ие суретшілердің қатарында. Сәуленің туындылары Sharjah Art Foundation, Alain Servais коллекциясы, Еуразиялық Мәдени Альянс, Ә.Қастеев өнер мұражайы сынды галереяларда тұр.
Суретші шығармашылығындағы осынау әдіске қоғамның Табиғат-Анаға деген көзқарасы түрткі болған. «Қайбір жылдары Астана мен Алматы арасында пойызбен жиі сапарладым. Жазық даламен әрі-бері өткенде қызғалдақтар жайқалған мезгілді көргім келетін. Алайда оның орнына пластик шөлмектер мен пакеттердің шашылып жатқанына ішім ашитын. Дала – біздің рәмізіміз, ел мақтанышы, тіпті барлық жерде пластик қоқыс жайрап жатса да, бәріміз осы дархан даламызбен мақтанамыз. Целлофан қалталар жер-көкте ұшып жүр, өсіп тұрған шөптер мен ағаштарға жабысып, жер-жерде шашылып жатады. Бір қызығы, олар еріп, жоқ болып та кетпейді. Міне, бұл – кезеңнің дерті», дейді Сәуле Сүлейменова.
Суретшіні толқытқан осындай ішкі толғаныстар үні өнеріне ауысқан.
«Целлофан пакеттерді қалай пайдалануға болатынын ойластыра бастағанда, оның ештеңеге де жабыспайтынын байқадым. Ол тек жоғары температурада ерітілгенде ғана екінші пластикке жабысады екен. Сондықтан маған желім пистолет пен полигаль (қалың мөлдір пластикалық парақтар) қолдануға тура келді. Бір жағынан, ол қоқыс, бірақ оның мүлдем жоқ болып кетпейтініне зер салсақ, пластикті қымбат металл немесе мұнай өнімі, алтынмен пара-пар деп қарауға да болады. Пакеттердің мөлдірінен бастап, ақ, түрлі-түсті кемпірқосақ сынды, тіпті қара түске дейінгі барлық түсті табуға болады. Сол секілді, ондағы жарнама мәтінінде, бренд атауында және басқа да сыртында басылған ақпараттарда жазылған сөздерде неше түрлі ой, пайым бар. Мұның бәрі тура біздің өміріміз секілді, қилы-қилы, ащы да тәтті, күлкілі де қорқынышты, әдемі әрі сұрықсыз», дейді суретші.
С.Сүлейменованың Астанада өткен «Milestone» атты жеке көрмесін ұйымдастырған тәуелсіз арт-кеңесші Владислав Слудский: «Суретші 1993 жылдардағы жағдай, натюрморт, гүл, жеке оқиғадан бастайды да, аруақ, Астана-лайн, урбанизация, өткеніміз бен болашағымыз арқылы саяси, әлеуметтік мәселелерге ойысады. Оның «Жұмысшылар» деген картинасын алып қараңызшы. Негізі мұндай тақырыпқа көп суретші бара бермейді. «Аруақтар» деген картинасын да жекелеген адамдар мен саясаттың ортасындағы көпір деп есептеймін. Суретшінің саяси тақырыптағы туындыларын көрермен жылы қабылдайды. Бір қуаныштысы, Сүлейменова халықаралық деңгейде де жоғары бағаланып жүр. Дәл қазір оның туындылары Дюнкерк қаласындағы FRAC Grand Large – Hauts-de-France мұражайында тынымал суретшілердің еңбегімен қатар тұр», дейді.
АЛМАТЫ