Аралдықтардың алғашқы өнімі
<p style="text-align: justify;">Қызылорда облысындағы жеті ауданның ішінде күріш екпейтін аймақ – Арал ­ауданы. Негізінен балық, мал шаруашылығымен айналысатын Сырдария­ның теңізге құяр тұсындағы өңір тұрғындары жер несібесіне кейінгі жылдары ғана бет бұрып келеді. Биыл мұнда 87 гектар көкөніс, 342 гектарға бау-бақша дақылда­рын егу межеленген.</p>
Қосжар ауылдық округіндегі жеке кәсіпкер Елтай Төреханов тамшылатып суару әдісі арқылы 2 гектарға қияр, 1,5 гектар алқапқа қызанақ, 14 гектарға қауын-қарбыз егіпті. Қазір күніне қиярдан 150-200 кило өнім алып отыр. Өнім ауылдағы азық-түлік дүкендерінде 200 теңгеден сатылымға шығарылды. Ал өзге аймақтардағы базар сөрелеріне 350 теңгеден жіберіледі. Жақын арада қарбыз бен қызанақ та пісіп, сауда сөресіне түседі.
Ал Сексеуіл кентінде Ахметжан Боханов 240 шаршы метрлік жылыжай салып, голландиялық қиярдың бірнеше сортын өсіреді. Мемлекет тарапынан қолдау көріп, қайтарымсыз грант алған кәсіпкер жылыжайдан бөлек 7 гектарға қауын-қарбыз егіпті.
Осылайша, жергілікті кәсіпкерлер мен өңірдегі ірі сауда орындары мен шағын дүкендерге нарықтағы бағадан едәуір арзан өнім жеткізіп, бағаны тұрақтандыруға өз үлесін қосып отыр.
Қызылорда облысы