Платиналы дискіні музейге тапсырды
<p style="text-align: justify;">Әйгілі «Грэмми» сыйлы­ғының иегері Иманбек Зей­кенов Потанин атын­дағы тарихи-өлкетану му­зе­йіне өзінің платиналы дискі­сін тарту етті. Заманауи му­зы­калық коллекция саз өне­ріне аңсары ауған жас өрен­дер үшін қызықты болатынына дау жоқ.</p>
Бұл жаңалықты Потанин атындағы Тарихи-өлкетану музейі әлеуметтік желідегі парақшасында хабарлады. «Қазақстандық диджей әрі саунд-продюсер Иманбек Зейкенов 2021 жылы алған платиналы дискіні музейге сыйлап, экспонаттар қорын толықтыра түсті. Жақын күндері бұл ерекше экспонатты біздің экспозицияларымыздан көре аласыздар» делінген ақпаратта. Музейдің бас қор сақтаушысы Әлия Жомартованың айтуынша, бүгінде аталған мекеменің қорында 143 мыңнан астам жәдігер бар. Мәдени ұйымға қарасты Майра Шамсутдинова атындағы ән-өнер музей-үйінде көбіне саз өнеріне қатысты экспонаттар топтастырылған.
Айтып өтейік, платиналы дискіні Иманбек шетелдік танымал әнші-сазгерлер Rita Ora және David Guetta-мен бірге өңдеген «Big» композициясы үшін алған. Бұл тректе би музыкасы, электро-поп, хип-хоп және хаус ырғақтары бар. Кезінде музыка сыншылары әуенде кездесетін дыбыстар мен вокалға ерекше мән берген. Бұл туынды Болгариядағы музыкалық чарттарда жетінші орынды иеленсе, Германия, Мажарстан, Ирландия, Литва, Швейцария, Ұлыбритания елдерінде тыңдарман тарапынан жоғары бағаланды. Billboard Dance/Electronic Songs рейтингінде 11-орынмен түйінделді.
ПАВЛОДАР