Олжалы оралды
<p style="text-align: justify;">Дәстүрлі түрде ұйымдастырылатын «Біржанның інілері, Сараның сіңлілері» республикалық айтысына әулиеталық ақындар да қатысты. «Алматы тв» телеарнасы түсірген айтыс бәсекесінде өңірдің жүйріктері жоғары деңгейде өнер көрсетіп, олжалы оралды.</p>
Еліміздің әр қиырынан жалпы саны 28 үміткер топқа түскен додада Жамбыл облысынан төрт ақын бақ сынады. Төртеудің екеуі үздіктердің қатарынан көрінді.
Шымкенттік Нұрлан Есенқұловпен айтысқан әулиеаталық Алтынкүл Қасымбекованың өнерін қазылар алқасы да, өнерсүйер қауым да жоғары бағалады. Жеңге мен қайны айтысының тамаша үлгісін көрсеткен аталған жұптың сөз сайысы расымен де сәтті шықты.
Атыраулық Фариза Жетпісбаймен сөз сайысқа түскен жамбылдық Мұхтар Қонарбаев та аянып қалған жоқ. Қыз бен жігіт арасында өрбіген айтыста жерлесіміз қарсыласының әдемі әзілдеріне ұтымды жауаптар қайтарып, өзінің бабында екенін көрсете білді. Сондай-ақ Тұрар Рысқұлов ауданының тумасы Айтбек Тұрсынбай мен шығыстық Бибігүл Таубалдиева, Жамбылдың үкілі үміті Алина Айдаралы мен алматылық Ақниет Жұбаныш арасындағы айтыстар да қазылардың көңілінен шықты.
Республикалық деңгейде ұйымдастырылған айтыс аламанында өңір намысын қорғаған Алтынкүл Қасымбековаға жүлделі екінші орын бұйырса, Мұтар Қонарбаев үздік үштікті қорытындылады.