Үздік жас математик
<p style="text-align: justify;">АҚШ-та өткен Copernicus Olympiad білім бәсекесіне әлем­н­ің 23 елінен 360-қа жуық оқу­шы қатысты. Қазақстан намы­сын арнайы іріктеуден өт­кен 51 оқушы қорғады. Оның қа­та­рында Әли Насырбек те бар.</p>
Әли Астанадағы «Nurorda» мектебінің 4-сыныбында оқиды. Ол Нью-Йоркте ұйымдастырылған олимпиадада топ жарды.
– Математика – менің қалауым. Оған дайындалу үшін IELTS бағдарламасын қолданамын. АҚШ-тағы сайыс екі кезеңнен тұрды. Бірінші кезең онлайн форматта өтті. Оны еңсергендер финалға жолдама алды. Бірінші кезеңге 1 сағат 30 минут берілді. Тапсырма 20 сұрақтан тұрды. Финалдағы тапсырма саны 25 сұрақты қамтыды. Болашақта Массачусетс технологиялық институтына түскім келеді. Инженерлік бағытты ұнатамын, – дейді Әли.
Үш күнге созылған олимпиада кезінде қатысушылар Колумбия, Бостон, Гарвард, Массачусетс секілді оқу орындарын аралап көрді.
– Интеллектуалды сайыс туралы Әлидің сынып жетекшісі айтқан еді. Жалпы, Copernicus Olympiad бәсекесі биыл төртінші рет өткізілді. Дәстүрлі олимпиадаға Қазақстан алғаш рет қатысты. Ереже бойынша финалға өту үшін бірінші кезеңде қатысушылардың алғашқы 40 пайызының қатарына қосылу керек болды. Әли тыңғылықты дайындалды. Соның нәтижесінде жеңіске жетті. Олимпиададан бірінші орын алып келу керек деген мақсатты көздемедік. Қатысып, тәжірибе жинаса екен дедік. Бақытымызға орай, бағы жанып, олжалы оралды, – дейді оқушының әкесі Нұрбол Төлебаев.
Айтпақшы, халықаралық сайыстан топ жарып, білімі мен дарынының арқасында жүзден жүйрік, мыңнан тұлпар атанған оқушы домбыраның құлағында ойнайды, жүзу мен шахматты да жетік меңгерген. Сонымен қатар каратэнің көк белбеу иегері. LEGO-ның роботтехника курсына да қатысады.
Салтанат БАЙТЕКЕНОВА,
Х.Досмұхамедов атындағы Атырау университетінің 4-курс студенті