Өнердің ордасына айналғандай
<p style="text-align: justify;">Академик Қаныш Имантайұлы Сәтбаевтың есімін иеленген кенді қала осы күндері өнердің де ордасына айналғандай. Қалада кейінгі сегіз жыл бойы республикалық айтыс өткізіліп келе жатқаны да соның айғағы іспетті. Биылғы «Кен қазған құтты мекенім» атты сөз сайысы қаланың 50 жылдық мерейтойына арналды.</p>
Айтысқа еліміздің әр түкпірінен 14 айтыскер келіп, бақ сынады. Олар кенді өлкенің тарихын, бүгінгі жетістігі мен кемшін тұстарын сөзбен өрнектеді. Екі күн бойы залда ине шаншар орын болмағанынан-ақ айтыстың қандай деңгейде өткенін бағамдау қиын емес.
Сәтбаев қаласының әкімі Шапағат Әубәкір өнерге жақын, өзі де өлең жазатын азамат. Оның айтыстың ашылу, жабылу салтанаттарын бір ауыз өлеңмен әдіптеп жібергені тіпті керемет болды.
Айтыс қорытындысында ақтөбелік Нұрбол Жауынбаев, павлодарлық Рауан Қайдаров, астаналық Нартай Тілеуқұл, сәтбаевтық Абзал Мақаш, жамбылдық Алина Айдаралы, қызылжарлық Жарқын Жұпархан Алғысхатқа ие болып, әрқайсысы 400 мың теңге сыйақымен марапатталды.
Кенді өлкенің мақтаныштары, ақындар Кәкімбек Салықов пен Шынболат Ділдебаев атындағы арнайы жүлделерге Батыс Қазақстан облысының ақыны Мұрадым Мирланов пен Абай облысының Айшолпан Тілеутайы ие болды. Оларға 500 мың теңгелік сыйақы табысталды.
ІІІ орын иеленген павлодарлық Аспанбек Шұғатаев пен шымкенттік Нұрлан Есенқұловқа 700 мың теңгелік, ІІ орын иегерлері – алматылық Айым Асылбекқызы және қызылордалық Мұхтар Ниязовқа 1 млн теңге, І орын алған қарағандылық Дидар Қамиға 1,5 млн теңгелік сыйлық берілді.
Бас жүлде Қызылорда облысының ақыны Мейірбек Сұлтанханға бұйырды. Ол айтыстың 2 млн теңге сыйақысын жеңіп алды.
Айтысты ақын, филология ғылымдарының докторы, Парламент Мәжілісінің депутаты Аманжол Әлтай жүргізіп отырды. Ол айтыс өнерін насихаттауға қосқан үлесі үшін «Сәтбаев қаласына – 50 жыл» мерекелік медалімен марапатталды.
Ұлытау облысы,
Сәтбаев қаласы