«Торпедоның» бағы жанған күн
<p style="text-align: justify;">29 қазан күні «Барыс» өз мұзайдынында Нижний Новгородтың командасы «Торпедоны» қабылдап, 1:2 есебімен есе жіберді. Кездесу Қарағанды облысында қаза болған шахтерлерді бір минуттық үнсіздікпен еске алумен басталды.</p>
Ойынның алғашқы кезеңі торпедолықтардың басымдығымен өтті. Алма-кезек шабуылдардың бірінде қонақтар сапынан Владислав Фирстовтың қанжығасы майланып, 15:34 секундта есеп ашты. Екінші кезеңде 6 500-ден аса жанкүйердің салы суға кетті. Себебі ойынның 26:40 секундында Егор Виноградов барыстықтардың қақпасынан саңылау тапты – 0:2.
Тек үшінші кезеңде ғана Батырлан Мұратов (43:49 секунд) таразы басын қысқартып, үміт сыйлаған еді. Алайда одан кейін Ғалым Мәмбеталиев шәкірттері тағы да қарсыластар қақпасына шайба соғуға шамасы жетпеді. Қорытынды есеп 1:2, қонақтардың пайдасына шешілді.