Мәскеуді думанға бөлеген «Әл-Әки»
<p style="text-align: justify;">Республика күніне орай Қазақстанның Ресейдегі елшілігінде салтанатты қабылдау рәсімі өтіп, мерекелік концертте павло­дарлық «Әл-Әки» фоль­­клорлық-этногра­фия­лық ансамблі өнер көрсетті.</p>
«Әл-Әки» ансамблінің Мәскеуде өткен мерекелік іс-шараға шақырту алуы кездейсоқ емес. Биыл құрылғанына 30 жыл толып отырған өнер ұжымы ресейлік жергілікті шығармашылық ұжымдармен берік қарым-қатынас орнатып үлгерген. Ресейлік өнерпаздар қатысқан талай фольклорлық фестивальдарда өнер көрсетіп, көпшіліктің ыстық ықыласына бөленген. Ертіс-Баян даласын ән-жырға қосқан домбырашылар Мәскеу төріндегі іс-шарада шабыттарын шалқытып, ерекше күш-қуатпен шарықтады.
«Осынау салтанатты кеште елордадан барған «Шабыт» домбырашылар ансамблімен бірге сахнада өнер көрсетіп, шығармашылық қарым-қатынасымызды нығайта түсуге негіз болды. Біздің ұжым Ресей жерінде домбыраның қоңыр үнін қашан паш етеді екен деген үміт бар еді. Сол мақсатымыз орындалғандай. Салтанатты қабылдауда бірнеше мемлекеттің Ресейдегі елшіліктерінің өкілдері болды. Олар біздің домбырашылар мен әншілеріміздің өнеріне тәнті болды», дейді Павлодардағы Естай атындағы мәдениет сарайының басшысы Сапар Шайхимов.
Айтып өтейік, «Әл-Әки» фольклорлық-этнографиялық ансамблінің көркемдік жетекшісі – Мәдениет қайраткері Жасқайрат Орынбаев. Мерекелік кеште домбырашылар Құрманғазының «Балбырауыны» мен Н.Тілендиевтің «Әлқиссасын», өзге де танымал күйлерді сылқылдата тартып, қазақтың белгілі әндерін орындады.
Мәскеуге шығармашылық сапары барысында «Әл-Әки» халықтық-фольклорлық ансамблі ондағы Абай ескерткішіне барып, ақынның рухына тағзым етті. Абайдың бұл ескерткіші 2006 жылы Ресейдегі Абай жылы аясында, Қазақстан елшілігіне жақын жерде ашылған еді.
Мәскеу