Балет әртісінің жеңісі
<p style="text-align: justify;">«Астана опера» театрының балет әртісі Қуат Кәрі­баев Ресейде өткен «Одиссея-Arts» халықаралық көпжанрлы арт-олим­пиаданың «Хореография» аталымында I дәрежелі лауреа­т атанды.</p>
Арт-олимпиаданың ұйымдастырушылары дарынды өнерпаздың Кремль сарайында қойылған Б.Асафьевтің «Бақшасарай бұрқағы» атты балетіндегі өнеріне тәнті болып, оған байқауға қатысуға ұсыныс білдірген.
«Фестивальға А.Аданның «Корсар» балетінен па-де-де нөмірін алып бардым. Бұған сахнадағы серіктесім, балет әртісі Гүлназ Жанаева екеуміз бар күшімізді салып, дайындалдық. Әрине, жеңіске жеткенімізге қуанамын. Бұл бізді шабыттандырады. Марапаттаудан кейін ұйымдастырушылар бізді Челябинскіде өтетін байқаудың гала-концертінде өнер көрсетуге шақырды», деді ол.
Сондай-ақ Қ.Кәрібаев өз шығармашылығында «Астана опера» балет труппасының көркемдік жетекшісі, Ресейдің халық әртісі Алтынай Асылмұратованың орны ерекше екенін айтты. «Алтынай Әбдуахимқызының қамқорлығы менің өмірімді түбегейлі өзгертіп, жаңаша серпін берді. Сол кісінің арқасында өнерде өзімді таныта алдым. Айтсам деп армандаған көптеген жаңа партияны орындадым. Соның бәрі мені қанаттандырды. Қазір екі есе шабытпен жұмыс істеп жатырмын», деді байқау лауреаты.
Айта кетейік, аталған арт-олимпиада «Білім, мәдениет және өнердің көпұлтты қоғамды дамыту факторы ретіндегі интеграциясы» атты халықаралық ашық форумы аясында ұйымдастырылды. Іс-шараның мақсаты – түрлі мәдениет пен ұлт өкілдерін біріктіру.