Оқушының оңды ісі
<p style="text-align: justify;">Ілкідегі қазақы қағидаға ден қойсақ, «талаптыға нұр жауар» деген сөздің астарында кәтепті қара нарға жүк болатын мән бар екенін түйсінер едіңіз. Оқушының қолынан құрастырылған, әншейінде кәдеге аса қоймайтын шыны құтылардың қалдықтары да әжетке жарап қалады екен.</p>
Шортанды кентінің №3 жалпы білім беретін орта мектебінің оқушысы Әйгерім Анесий жосығы бөлек ғылыми жобаны қолға алыпты. Елді елең еткізе тін-ақ дүние. Әншейінде қоқыста шашылып жататын шыны қалдықтары кәдеге жарайды деп кім ойлаған. Талапты жастың өзі ешқандай шығын шығармай, ауылдастарының дастарқанын несібемен толтырар ғылыми жобаны қолға алып отыр. Математика және информатика пәндерінің мұғалімі Жарқынгүл Асауимен бірлесе отырып, жұмысқа қауырт кірісіп кеткен. Алдымен ауыл-аймақтан әрқилы дәрілерден босаған шыны құтыларын жинапты. Кейін оларды бір-біріне әдемілеп жапсырған. Көкөскінге қажетті су жинайтын бөшкелерді орналастырыпты. Құбыр да тартылған. Шатырдың ашылып-жабылуы ыңғайлы болуын да ұмыт қалдырмаған. Айтпақшы суару жүйесі толық автоматтандырылған.
– Жылыжай жұмысын 2022-2023 оқу жылдары аралығында сынақтан өткізіп көрдік, – дейді жоба жетекшісі Жарқын Асауи, – қолжетімді материалдарды қолдана отырып жасалған жылыжайда тәп-тәуір өнім өндіруге болады екен.
Байқампаз оқушы Әйгерім Анесий осы зерттеу жұмысын республикалық «Зерде» ғылыми жоба байқауына ұсынып, жүлделі орынға ие болыпты. Қаршадай қыздың талпынысы әбден құптарлық. Өзге де замандастары жақсыдан үйреніп, алға ұмтылып жатса бір ғанибет емес пе?!
Ақмола облысы,
Шортанды ауданы