Мәдени байланыс нығаяды
<p style="text-align: justify;">Мәдениет және ақпарат вице-министрі Ербол Әліқұлов Индонезия Білім, мәдениет, зерттеулер және технологиялар министрлігі мәдениет басқармасының бас директоры Хильмар Фаридпен, Индонезияның Қазақстандағы елшісі Мохамад Фаджрул Рахманмен кездесті.</p>
Ербол Әліқұлов өткен жылы Қазақстан мен Индонезияның дипломатиялық қарым-қатынасына 30 жыл толғанын атап өтті.
«Осы уақыт ішінде елдеріміз екіжақты өзара тиімді ынтымақтастық аясында тығыз және сенімді қарым-қатынас орнатты. Қазір біз екі елдің мәдени іс-шараларға қатысуы арқылы бірлескен жұмысты жандандыруымыз қажет», деді Мәдениет және ақпарат вице-министрі.
Қазақстан мен Индонезия арасындағы мәдени ынтымақтастық туралы меморандумға 2013 жылы қол қойылған. Серіктестер өзара байланыс аясын кеңейтуге ниетті.
«Қазақстан мен Индонезияның ортақ тұстары көп. Біз – көпэтносты және алуан мәдениетті мемлекетпіз. Біздің ынтымақтастығымыз бұдан да тиімді әрі жемісті болатынына сенімдімін», деп атап өтті Хильмар Фарид. Сонымен қатар екі елде де алмасу негізінде оқитын студенттер санын көбейтуді ұсынды.
Жиын соңында қатысушылар бейнелеу және сәндік-қолданбалы өнер, музыка, театр және кинематография саласындағы ынтымақтастықты қарастыруға және нығайтуға дайын екенін атап өтті.