Азия чемпионы атанды
<p style="text-align: justify;">Алматыдағы «Sadu Arena» спорт кешенінде кәсіпқой бокс кеші өтті. Отандық «Irfin Promotions» компаниясы ұйымдастырған турнирге Қазақстаннан бөлек, Өзбекстан, Танзания, Ресей, Грузия, Қырғызстан және Үндістаннан келген былғары қолғап шеберлері қатысты.</p>
Аталған жарысты тамашалауға кәсіби спорт шеберлерінің бір шоғыры келген екен. Солардың арасынан КСРО дәуірінде атой салып, Олимпия ойындарында жеңіс тұғырына көтерілген Серік Қонақбаев пен Виктор Демьяненко, Еуропа чемпионатының қола жүлдегері Кәрімжан Әбдірахманов, Олимпиада чемпиондары Василий Жиров пен Ермахан Ыбырайымов, кәсіпқой бокстың көкжалы Марат Мәзімбаев, әлем чемпионы Ердос Жаңабергенов, тағы басқа саңлақтарды көзіміз шалды.
Бокс кешінің басты жекпе-жегі жерлесіміз Руслан Мәдиев пен ресейлік Тигран Согоян арасында өтті. Кезінде Руслан Геннадий Головкиннің командасында болып, әйгілі «Golden Boy» компаниясы ұйымдастырған жарыстарда күш сынасты. Қарағанды бокс мектебінің түлегі 17 бәсекенің 15-інде басымдық танытып, алты кездесуін мерзімінен бұрын аяқтады. Қарсыласы – Ресей чемпионы. 10 раундқа созылған айқаста Мәдиевтің мерейі үстем болды. Осы жеңісінің арқасында Руслан WBA нұсқасы бойынша Азия чемпионы атанды.
Алматыдағы жарыста Руслан Мәдиевтен бөлек, басқа да жерлестеріміз жеңіске жетті. Солардың арасынан ағайынды Санатәлі мен Саматәлі Төлтаевтар, Елшат Нығметолла, Нұрдос Төлебай, Әділет Құрметов, Әлішер Абдуләлім және Армат Арманұлының асқан шеберлігіне тәнті болдық.