«Қазақстан барысына» – пәтер мен көлік
<p style="text-align: justify;">«Қазақстан барысы» тур­нирі – жыл сайын елі­міздегі үздік ба­луан­дар­дың басын қосатын, дәстүрге ай­налған дүбірлі дода. Би­ылғы турнирге еліміздің барлық өңірлерінен 42 үздік балуан қатысып, бақ сынасты.</p>
Абай облысының әкімі Нұрлан Ұранхаев «Қазақстан барысы» турнирінің биылғы жеңімпазы Ерасыл Қажыбаев пен турнирдің қола жүлдегері Саят Шәмшиевті арнайы қабылдады. Кездесуде өңір басшысы аймақ абыройын асырған балуандарға алғыс білдіріп, олардың жеңісі тек спорттық жетістік қана емес, жастарды отаншылдыққа, саламатты өмірге баулитын лайықты үлгі екенін ерекше атап өтті. Ұлттық спортты дамытуға, насихаттауға қосқан үлесі үшін демеушілер атынан қос спортшыға темір тұлпар табысталды. Сондай-ақ биылғы «Қазақстан барысы» Ерасыл Қажыбаев үш бөлмелі пәтердің сертификатына ие болды.
Жанкүйерлерге самбо, дзюдо күресі арқылы жақсы танымал Е.Қажыбаев халықаралық ареналарда да айтарлықтай жетістіктерге жеткен. Ол – дзюдодан кадеттер мен жастар арасындағы ел чемпионатының жүлдегері, Джакартадағы Азия ойындарының командалық жарысының күмкіс медаль иегері, самбодан Азия чемпионы, әлем чемпионатының қола жүлдегері.
«Мен бұл турнирге алтыншы рет қатысып отырмын. Жеңісімді туған жеріме, жерлестеріме арнаймын. Алдағы аламан жарыстарға да тыңғылықты дайындалып, ел сенімін ақтауға тырысамын», деді Е.Қажыбаев.
Турнирдің қола жүлдегері, «Болатшы» лақап атымен өнер көрсеткен Саят Шәмшиев те белгілі балуан, халықаралық дәрежедегі спорт шебері, дзюдодан еліміздің чемпионы, самбодан әлем чемпионатының қола жүлдегері.
СЕМЕЙ