Үздіктер үкіленді
<p style="text-align: justify;">Жылдағы дәстүрге сәйкес сан салада жемісті еңбек етіп жүрген дарынды жастар облыс әкімінің сыйақысына ие болды. «Әулиеата үздігі» байқауында бақ сынаған талантты жастарды марапаттау рәсіміне өңір басшысы Ербол Қарашөкеев арнайы қатысты.</p>
«Талантты жас қай кезде де қоғамның қозғаушы күшіне айналатыны белгілі. Мемлекет басшысы Қасым-Жомарт Тоқаев өз саласында үздік саналған жастарды қолдап келеді. Ұшқыр ойлы жастарды қанаттандыру, оларға қолдау көрсету жұмысы Әулиеата өңірінде де тоқтаған емес. Білімімен дараланып, ізденісімен көзге түскен жастарды қолдауға қай кезде де дайынбыз. Олардың бір бөлігі бүгін «Әулиеата үздігі» атанып отыр», деді өңір басшысы байқау лауреаттарын марапаттау рәсімінде.
«Әулиеата үздігі» байқауының қорытындысына сәйкес «Жылдың үздік жас ақыны» аталымы бойынша ақын Арайлы Жақсылық үздік деп танылса, «Жылдың үздік жас журналисі» аталымында «Еуразия» телеарнасының өңірдегі меншікті тілшісі Ұлдана Жұбай жеңістің биік тұғырынан көрінді. Ал «Жылдың үздік жас спортшысы» аталымында Бексұлтан Боранбай жеңімпаз атанса, «Өнер саласының үздік маманы» аталымы бойынша Кенен Әзірбаев атындағы облыстық филармонияның өнерпазы Дидар Басықараев топ жарды. Бұдан өзге де бірнеше аталым бойынша жеңімпаздар қомақты қаржылай сыйлыққа ие болды.
Салтанатты іс-шара барысында «Тәуелсіздік ұрпақтары» грантының иегерлері де анықталды. Нақтырақ айтсақ, ғылым бағыты бойынша Дәулет Жаманқұл, Шынар Тоқтамыс, мәдениет саласы бойынша Аяна Ким, Ақарыс Сайлау, медиа саласы бойынша Мерей Бает пен Ерқасым Әбдірахман үздік шықты. Грант иегерлерінің барлығына 1 млн теңгенің сертификаты табысталды.
Тараз