Елден қашпақ болған шетелдік дроппер ұсталды
<p style="text-align: justify;">Жамбыл облыстық Полиция департаментінің киберполиция қызметкерлері облыстық прокуратурамен бірлесіп, Ресей Федерациясының 33 жастағы азаматын ұстады, деп хабарлайды <a href="/" target="_blank" rel="noopener noreferrer">Egemen.kz</a> Polisia.kz сайтына сілтеме жасап.</p>
Ер адам Алматы қаласындағы сауда орталықтарында жәбірленушілердің банк шоттарынан ақша ұрлауға бағытталған алаяқтық схемаға қатысы бар деген күдікке ілінген.
«Тараз қаласының полиция басқармасына зейнеткер әйел шағымданып, белгісіз біреудің алдау жолымен оның 13,2 млн теңге қаражатын иемденіп алғанын мәлімдеген. Қылмыскер интернет-ресурстарды пайдаланып, зейнеткердің банк шотына қатысты алаяқтық әрекеттер жасаған. Күдікті Қазақстан аумағынан шығып кетпек болған кезде ұсталды», делінген хабарламада.
Аталған факті бойынша ҚР Қылмыстық кодексінің 190-бабы 3-бөлігіне (алаяқтық) сәйкес сотқа дейінгі тергеу амалдары басталған. Қазіргі таңда тергеу шаралары жүргізіліп, қылмыстың барлық мән-жайы анықталып жатыр.