Көлік инфрақұрылымын өркендету қажет
<p style="text-align: justify;">Үкіметтің кеңейтілген отырысында бірқатар негізгі әлеуметтік-экономикалық мәселелер қаралып, Мемлекет басшысы одан әрі дамыту үшін айтарлықтай әлеуеті бар көлік-логистика саласына баса назар аударды. Жиында Президент еліміздің халықаралық аренадағы бәсекелестік артықшылықтарын қамтамасыз ететін негізгі факторлардың бірі ретінде Транскаспий дәлізін дамытудың және транзиттік әлеуетінің стратегиялық маңыздылығын атап өтті.</p>
Былтыр елімізде жүк тасымалдау көлемі 10%-ға артып, Үкіметтің есебіне сәйкес, бұл шамамен 1 млрд тоннаны құраған. Әсіресе Транскаспий бағытындағы контейнерлік тасымалдау секторы 2,7 есеге өскен. Демек жаһандық логистикалық тізбектердің негізіне айналып отырған көлік артериялары серпінді даму үстінде.
Жақында ғана Қашаған кен орнынан Каспий теңізі арқылы Ақтау-Баку бағыты бойынша алғашқы мұнай партиясы жөнелтілді. Бұл энергетикалық бағыттарды әртараптандырудағы маңызды қадам болды. Жоба Транскаспий бағытының әлеуетін нығайтуға және жаһандық логистикалық желінің негізгі элементі ретінде аймақтың маңыздылығын арттыруға көмектеседі.
Инфографиканы жасаған – Амангелді Қияс, «EQ»
Дүниежүзілік банктің болжамына сүйенсек, 2030 жылға қарай орта дәліз негізінде Каспий теңізі арқылы тасымалдау көлемі үш есе артып, 11 млн тоннаны құрайды. Оның 4 млн тоннаға жуығы контейнерлерде тасымалданады. Транзиттік жүктердің негізгі бөлігі Еуропа мен Қазақстан арасындағы, сондай-ақ Еуропа мен Қытай арасындағы сауданың бір бөлігі ретінде осы бағыт арқылы өтеді.
Мұндай өршіл мақсаттарға қол жеткізу үшін көлік инфрақұрылымын жетілдіруді жалғастыру қажет. Logistics Performance Index (LPI) рейтингінің «көлік инфрақұрылымы» қосалқы индексінде Қазақстан 2018 жылғы бағалаумен салыстырғанда позициясын жақсартқан. Яғни 138 елдің арасында 80-орынға ие болды (2018 жылы 81-орын). Дегенмен позицияларды одан әрі нығайту және жүк тасымалы көлемінің өсуін ынталандыру үшін айтарлықтай күрделі салым қажет. Еуропалық қайта құру және даму банкінің (ЕҚДБ) болжамдарына сәйкес, Орталық Азияның көлік инфрақұрылымын айтарлықтай жақсартуға қажетті инвестицияның жалпы көлемі еліміз үшін 5,5 млрд еуроны және жалпы аймақ үшін 18,5 млрд еуроны құрайды.
Көлік-логистикалық инфрақұрылымын одан әрі дамыту еліміздің жаһандық нарықтағы бәсекеге қабілеттілігін нығайтуда және оның әлемдік экономикалық үдерістерде интеграциясын арттыруда маңызды саналады.
Ерлан ЖАҚЫПОВ,
Президент жанындағы ҚСЗИ Жаһандық экономика және тұрақты даму бөлімінің басшысы