Бірімжановтың жерленген орны анықталды
<p style="text-align: justify;">Халқымыздың ардақты ұлдары – Ресей Мемлекеттік Думасы­ның алғашқы екі шақырылымының депутаты, заңгер Ахмет Бірімжанов пен қоғам қайраткері, алашшыл азамат Ғазымбек Бірімжановтың туған інісі Жұмахан Бірімжанов Екінші дүниежүзілік соғыста хабарсыз кет­кендердің қатарында болған еді. Алайда 83 жыл өткен соң, оның жерленген орны анықталғаны жөнінде хабар шықты.</p>
Жұмахан Қорғанбекұлы Бірімжанов – қатардағы жауынгер, 1919 жылы Қостанай облысы Торғай ауданы №3 ауылда (қазіргі Қостанай облысы Ә.Жангелдин ауданында) дүниеге келген. Ел басына күн туып, сұрапыл соғыс басталғанда ол Алматы қаласы Фрунзе аудандық әскери комиссариатынан шақырылып, Отан қорғауға
аттанады.
Соғыстан кейін хабарсыз кеткен сарбаздардың есімі мен жатқан жерін анықтау ұзақ уақыт бойы мүмкін болмаған еді. Жұмахан Бірімжанов майдан даласындағы ауыр шайқастардың бірінде, 1942 жылдың 19 желтоқсанында Ресейдің Волгоград облысы, Советское елді мекенінде ерлікпен қаза тапқан. Сүйегі кейіннен Волгоград облысы, Калачевский ауданы Калач-на-Дону қаласындағы «Павших борцов» алаңында орналасқан бауырластар зиратына қайта жерленген.
Бұл жаңалық – соғыс жылдарында шейіт кеткен боздақтардың ұрпақ жадынан ешқашан өшпейтінінің тағы бір дәлелі. 83 жыл бойы қаралы белгісіздікке оранған жауынгер рухы енді өз туыстарының жүрегінде, ел тарихының жарқын беттерінде мәңгілік сақталмақ.
Самат ЖҰМАТАЙҰЛЫ,
Ш.Уәлиханов атындағы Тарих және этнология институтының ғылыми қызметкері