Ел мектептерінде антибуллингтік бағдарлама енгізіледі
<p style="text-align: justify;">Бұл туралы бүгін Орталық коммуникациялар қызметінде өткен брифингте Оқу-ағарту вице-министрі Еділ Оспан мәлімдеді, деп жазады <a href="/" target="_blank" rel="noopener noreferrer">Egemen.kz</a>.</p>
«ДОСБОЛLiKe» антибуллингтік бағдарламасы 2025 жылдың 1 қыркүйегінен бастап іске асырылады. Бұл бастама Қазақстанның барлық мектебі мен колледжінде балалардың эмоционалдық әл-ауқатын қолдауға бағытталады.
Қазір «ДОСБОЛLiKe» антибуллингтік бағдарламасы еліміздің 9 өңірінде пилоттық режимде сыналып жатыр. Оған 70 мыңға жуық оқушы мен 5 мыңнан астам педагог қатысуда.
«Бұл бастама оқушылардың дау-жанжалдарға конструктивті түрде жауап беру дағдыларын қалыптастыруға, әлеуметтік-эмоционалдық қабілеттерін дамытуға, тұлғааралық және топаралық қарым-қатынастарды оңтайландыруға, сондай-ақ балалардың жалпы психологиялық әл-ауқатын арттыруға бағытталған. Әрбір баланың өзін қауіпсіз сезінетін және толыққанды дамитын ортада білім алуына жағдай жасау – аса маңызды қадам», деді ҚР Оқу-ағарту вице-министрі Еділ Оспан.
Бүгінде пилоттық жоба аясында буллингтің алдын алу, қақтығыс оқиғаларының себебі мен факторларын анықтау, сондай-ақ оларды шешу жолдарын түсіндіруді көздейтін курстар мен практикалық шаралар жиі ұйымдастырылады.
Министрлік өкілі бағдарламаның мақсат-міндетін ата-аналарға да түсіндіру жоспарланып отырғанын атап өтті.