Абай насихатшысы
<p style="text-align: justify;">Халық әртісі, Мемлекеттік сый­лықтың лауреаты, профессор Шахи­мардан Әбілов 75 жасқа толды. Өнер иесі­нің мерейтойына орай Пав­лодар­да «Шахимардан Абай шы­ңында» атты жинақтың тұсауы кесі­ліп, С.Торайғыров университетіндегі мәдени іс-шаралар өтетін залға әнші­­нің есімі берілді.</p>
Шахимардан Қайдарұлын отандастарымыз қайталанбас дауыс иесі ғана емес, ұлы Абайдың насихаттаушысы ретінде де жақсы таниды. Абай шығармашылығын, оның ішінде Қара сөздері мен әндерінің философиясын халықаралық сахналарда музыка арқылы тереңдете жеткізе білген бірден-бір опера әншісі. Ол тек опера әншісі ғана емес, таным көкжиегі кең, көркем ойлаудың шыңына шыққан бірегей өнер иесі, Абайша ойланып, Әуезовше толғана алған жан.
Жинақ – бір адамның өмір жолы ғана емес, тұтас бір дәуірдің мәдени тынысының айнасы. Кітапта тұлғаның шығармашылығынан бөлек, әнші туралы жазылған мақалалар мен зерттеулер де топтастырылған.
– Кезінде ғұлама жазушы Мұхтар Әуезов: «Сымбатты өнер болмаған елде мағыналы тіршілік жоқ. Қандай қауымды, қандай тапты алсақ та қаны мен жанының айнасын өнерге түсірмей тұра алмайды. Өнерден қуат алмаса тіршіліктің шамы сөнгені», деген екен. Сондықтан өнерден асқан ұлылық жоқ. Ал бұл еңбек халықтың арқасында келген дүние, – дейді мерейтой иесі.
ПАВЛОДАР