Алмагүлдің жұлдызы жанды
<p style="text-align: justify;">Беларусь Республикасында «Витебскі­дегі Славян базары» XXXIV халық­аралық өнер фестивалі өтті. Атал­ған байқауға елімізден Жетісу облыс­тық Дәнеш Рақышев атындағы филар­мониясының әншісі Алмагүл Батталиева қатысты.</p>
Әнші финалда «Вечность» композициясын орындап, көрерменді талантымен тәнті етті. Көпшіліктің көңілінен шығып, қазылар алқасының жоғары бағасына ие болды. Өнерпаз екі байқау күнінің қорытындысында 137 ұпай жинап, фестивальдың Гран-при жүлдесін жеңіп алды.
Алмагүл Батталиева – Алматы қаласының тумасы, дарынды жас әнші. Ерте жастан вокалдық қабілеті анық байқалған. 14 жасында П.И.Чайковский атындағы Алматы музыкалық колледжіне оқуға түскен. Сонымен қатар Алмагүл бірнеше аспапты – аккордеон, фортепиано және укулелені еркін меңгерген.
Алмагүл – шебер орындаушы ғана емес, сахнаға деген құрметі мен жауапкершілігі мол өнерпаз. Ол «Жас Қанат – 2023» фестивалі, «Алматым жүрегімде» халықаралық байқауы сынды беделді музыкалық сындарда жоғары деңгейде өнер көрсетіп, кәсіби шеберлігін бірнеше мәрте дәлелдеген.