Өнеркәсіп өндірісі жарты жылда 6,5%-ға өсті – Роман Скляр
<p style="text-align: justify;">Үкімет үйінде Мемлекет басшысы жүктеген өнеркәсіп, энергетика және көлік салаларындағы міндеттердің орындалу барысына арналған Үкіметтің баспасөз мәслихаты өтті. Жиында Премьер-Министрдің бірінші орынбасары Роман Скляр нақты сектордың даму көрсеткіштерімен бөлісті, деп хабарлайды <a href="/" target="_blank" rel="noopener noreferrer">Egemen.kz</a>.</p>
Роман Склярдың айтуынша, 2025 жылдың алғашқы алты айында өнеркәсіп өндірісінің көлемі 28,9 трлн теңгені құрап, 6,5%-ға өскен.
«Оның ішінде өңдеу өнеркәсібі 13,7 трлн теңгеге өнім өндірді, бұл өткен жылғы көрсеткіштен 5,5%-ға жоғары. Өңдеуші сектордың елдің Жалпы ішкі өнімге қосқан үлесі - 12,4%», деді Премьер-Министрдің бірінші орынбасары.
Оның хабарлауынша, өсім машина жасау (+11,1%), химия өнеркәсібі (+7%), құрылыс материалдарын өндіру (+8,6%) және азық-түлік өндірісі (+10%) салаларындағы белсенділік есебінен қамтамасыз етілген.
Сонымен қатар, биыл жалпы құны 1,5 трлн теңге болатын 190 жоба іске қосылады деп жоспарланған. Қазіргі уақытта 196 млрд теңгенің 47 жобасы пайдалануға беріліп, 3 мыңнан астам жұмыс орны ашылды.