Араб елдері қызығушылық танытып отыр
<p style="text-align: justify;">Еліміз туризм саласында араб елдеріне жақсы танымал бағыт­тардың қатарына еніп келеді. «Khaleej Times» зерттеуі бойын­ша, Біріккен Араб Әмірліктері тұрғындарының 60%-ы жаз­ғы ­маусымда шетелге саяхаттайды. Олардың көпшілігі от­ба­сылық демалысқа ыңғайлы, визасыз бағыттарды таңдайды.</p>
Трендтегі елдердің қатарына елімізбен бірге Әзербайжан, Грузия, Өзбекстан, Қырғызстан, Армения кірген. Бұл мемлекеттер визалық режімнің қолайлығымен ерекшеленеді. «Gulf times» басылымы осындай, қысқа қашықтыққа саяхаттаудың танымалдылығы арта түскенін жазады. Оның ішінде экспатрианттар арасында визалық жеңілдіктер ұсынатын елдерге баруға сұраныс көбейген. Сол тұрғыда, біздің елден бөлек, Грузия, Әзербайжан, Мысыр, Иорданияға сапар туристерге танымал бола түскен.
Жақында жазғы маусымда баруға болатын 15 трендтік бағыт жария етілді. Еліміздің БАӘ туристері арасында танымал болуына мәдени мұра мен табиғи ландшафттардың алуан түрлілігі, ең бастысы, қолжетімділігі әсер еткен. «Middle East Economic» басылымында еліміз Орталық Азиядағы ең ірі заманауи қалалар мен бірегей табиғи ландшафтардың, бай мәдени мұраның орталығы ретінде сипатталған. Елордамен қатар Алматыдағы «Медеу» мұз айдыны, «Шымбұлақ» тау курорты, «Шарын» шатқалы, «Көлсай» көлінің тартымдылығы туралы жазылған. Осыған қоса «Алтын-Емел» ұлттық паркі, Түркістандағы Қожа Ахмет Ясауи кесенесі жазғы маусымда саяхаттауға қолайлы бағыттардың қатарына енген.