Жастар денсаулығына – жіті назар
<p style="text-align: justify;">Кейінгі жылдары елімізде жастар арасындағы ер­те жүктілік, аборт жасату жиі­леп, қоғамның алаң­дау­шылығын тудырып отырғаны белгілі. Осы тұрғыда Президент жанын­дағы Әйелдер істе­рі және отбасылық-демо­г­рафиялық саясат жөнін­дегі Ұлттық комис­сия жасөспірімдер мен жас­тардың репродуктивтік денсаулығын сақтауға ай­рық­ша басымдық беріп келеді.</p>
Денсаулық сақтау министрлігінің дерегі бойынша, бұл көрсеткіштер бірнеше облыста жоғары деңгейде. Осыған байланысты Ұлттық комиссия шешімімен жергілікті атқарушы органдар, дәрігерлер, педагогтер, сарапшылар, ата-аналар және азаматтық қоғам өкілдері қатысатын арнайы семинар өткізіліп келеді.
Президент жанындағы Әйелдер істері және отбасылық-демографиялық саясат жөніндегі Ұлттық комиссия мүшесі, Парламент Мәжілісінің депутаты Жұлдыз Сүлейменова Маңғыстау облысында «Жастар мен жасөспірімдердің репродуктивтік денсаулығын сақтаудың тиімді жолдары» тақырыбында семинар өткізді. Семинарға Маңғыстау облыстық білім, денсаулық сақтау, жастар саясаты, дін істері, ақпарат және қоғамдық даму басқармаларының өкілдері, қала, аудан әкімдерінің әлеуметтік салаға жауапты орынбасарлары, құқық қорғау органдарының кәмелетке толмағандар істері, олардың құқықтарын қорғау және тұрмыстық зорлық-зомбылыққа қарсы күрес бөлімдері қызметкерлері мен педагог-психологтер, мектеп медбикелері, колледж, мектеп директорлары, тәрбие ісі жөніндегі орынбасарлары, ата-аналар комитеті мен БАҚ өкілдері, Аналар кеңестерінің мүшелелері қатысты.
Мәжіліс депутаты Ж.Сүлейменова «Ана мен баланы қорғау, ұлт саулығын сақтау – еліміздің табысты болашағының іргетасы. Балалар мен жасөспірімдердің денсаулығын нығайтуда инновациялық тәсілдерді енгізу – мемлекеттік саясаттың басты қағидаттарының бірі. Нәресте, бала және ана өлімін азайту, ерте жүктіліктің алдын алу – денсаулық сақтау жүйесінің тиімділігінің негізгі көрсеткіші болуға тиіс», деді.
Бұрын емханалар жанында жұмыс істеген жасөспірімдерге арналған бөлімшелер денсаулық сақтау реформасынан кейін жабылып қалған. Қазір бұл қызметті қайта ашу мәселесі күн тәртібінде тұр. Сондай-ақ міндетті әлеуметтік сақтандыру қоры арқылы жұмыс істейтін 4 Жастар денсаулығы орталығы толық пайдаланылмай келеді.
2024 жылы БҰҰ Халық қоры (ЮНФПА) жүргізген сауалнамада ел жастарының көпшілігі жыныстық денсаулық туралы ақпаратты интернет пен әлеуметтік желіден алатыны анықталды. Мәселені шешуде тек дәстүрлі сабақтармен шектелмей, цифрлық технологиялар мүмкіндіктерін пайдалану өзекті. Ата-аналармен жұмысты күшейту және мектептегі тәрбие сағаттарының мазмұнын жетілдіруге көңіл бөлу қажет, сондай-ақ отбасын қолдау орталықтарының жұмысын кеңейту шарт.
Семинарда әр қатысушы пікір білдіріп, ұсыныстарын ортаға салды. Бір жыл бұрын ашылған отбасын қолдау орталықтарының мақсаты, жұмыс жүйесі және тәжірибесі егжей-тегжейлі түсіндірілді. Басты мақсат – жастардың дені сау, саналы, білімді, өмірлік дұрыс таңдау жасай алатын ұрпақ болып қалыптасуы.
Маңғыстау облысы