Транзиттік тасымал көрсеткіші
<p style="text-align: justify;">Мемлекет басшысы Қасым-Жомарт Тоқаевтың биылғы Жолдауын­да еліміздің саяси-эко­номикалық даму бағыты айқын­далды. Оның басты екі арқауы бар: бірі – инвестицияны өндіріс сала­­­­­сына тарту, екіншісі – тран­зиттік-логистикалық әлеует­ті тиім­ді пай­далану. Соңғысы – қазіргі кезеңде айрықша өзекті.</p>
Жолдауда көлік-логистика жүйесін дамытудың маңызы аталып өтті. Президенттің айтуынша, өткен жылы еліміздің аумағы арқылы жүк тасымалының көлемі 1 млрд тоннадан асты. Бұл – Қазақстанның транзиттік әлеуетін айқын көрсететін көрсеткіш.
Мемлекет басшысы Транскаспий халықаралық көлік бағытын дамытудың қажеттігін атап өтті. Сонымен қатар жаңа инвестициялар тартылып, инфрақұрылым жақсарып, сапалы жұмыс орындары ашылуы қажет. Президент өңірлердің көлік байланысын нығайтуға, еліміздің ірі транзиттік аймақ ретіндегі мүмкіндіктерін толық пайдалануға ерекше мән берді.
Әлемдік нарыққа шығу мәселесінде де нақты мысалдар келтірілді. Мәселен, жуырда Қытайдың Ляньюньган порты арқылы қазақстандық бидай Вьетнамға жөнелтілді. Сондай-ақ Ауғанстан аумағындағы «Тургунди – Герат» теміржолын салу арқылы Пәкістан нарығына шығу көзделіп отыр. Ал «Шығыс – Батыс» бағыты бойынша ұзындығы 836 шақырым болатын «Достық – Мойынты» теміржолының екінші желісі іске қосылмақ. Бұл – қарқынды ілгерілеудің айқын дәлелі.
Үкімет тарапынан «Бақты – Аягөз», «Қызылжар – Мойынты» жобаларын жеделдетіп қолға алу жоспары жарияланды. Бұл шаралар еліміздегі теміржол жүйесінің толыққанды қаңқасын қалыптастыруға мүмкіндік береді. Алайда көлік саласында озық елдер қатарына қосылу үшін цифрландыру мен жасанды интеллектіні кеңінен қолдану қажеттігі де баса айтылды.
Жолдауда әлеуметтік-экономикалық мәселелермен қатар, саяси реформалардың жалғасын табатынына назар аударылды. Атап айтқанда, 2027 жылдан бастап Қазақстан бір палаталы Парламентке көшпек. Бұл – Конституциялық ауқымдағы өзгеріс. Ендігі жерде аймақтық мүдделер мен этносаралық қарым-қатынастарды реттеу, азаматтық қоғамның пікірін білдіру және заң шығару үдерісі Мәжілісте шоғырланады.
Президенттің айтуынша, азаматтардың құқықтары мен мүдделері ең жоғары құндылық ретінде қаралады. Барлық шешім, пікірталас пен саяси талқы Мәжілістің алаңында өрбімек. Бұл – елдің демократиялық дамуы жолындағы үлкен жауапкершіліктің белгісі. Жолдауда көтерілген бастамалар қоғам үшін маңызды әрі уақыт талабына сай.
Мақсат ЖАҚАУ,
саясаттанушы