Берлинде Димаш Құдайбергенге арналған «JULDYZ» көрмесі ашылды
<p style="text-align: justify;"><strong>Димаш Құдайбергеннің Еуропадағы жеке концерттерімен қатар, 12-17 қараша аралығында «JULDYZ» көрмесі өтті. Экспозицияда суретші Punktgeläut әншінің өмірі мен шығармашылығынан сыр шертетін туындыларын ұсынды, деп хабарлайды <a href="/" target="_blank" rel="noopener noreferrer">Egemen.kz</a>.</strong></p>
Берлиндегі Erster Erster галереясы осы аптада өнер сүйер қауым мен қала қонақтарын ерекше атмосфераға бөледі. Max-Schmeling-Halle аренасына жақын орналасқан галереяда ашылған көрмеде майлы бояумен және қарындашпен салынған жұмыстар көрермен назарына ұсынылған.
Суретші Punktgeläut туындыларында Димаштың сахнадағы жарқын сәттері мен шығармашылық белестері көрініс табады.
Көрмеде Димаштың өзінен бөлек, оның ата-анасы, Раушан Құдайберген мен Расул Усмановтың да портреттері қойылған.
Автордың айтуынша, Димаштың дауыс мүмкіндігі мен өнердегі орны – жанр атаулыдан биік.
«Берлиндегі алғашқы концертіне орай әзірленген бұл топтама – музыкалық феноменнің әлемдік ықпалын көрсететін шағын сый. Димаш тек гастрольдік сапарларымен ғана емес, қоғам мен мәдениетке қатысты маңызды мәселелерге үн қосатын ерекше тұлға. Ол – бейбітшілікті қолдаушы, білімге жанашыр, жас өнерпаздарға жол ашатын жарқын тұлға», дейді суретші.
Айта кетейік, сатылымынан түсетін қаражаттың жартысы Қазақстандағы білім мен экология бағытындағы жобаларды жүзеге асыратын «Сәби» қорының игілігіне аударылады.