«Пахтакор» – чемпион!
<p style="text-align: left;">Астана қаласында 11 жасқа дейінгі жасөспірімдер арасында футболдан «Astana Cup-2025» халықаралық турнирі өтті. Додада Тбилисидің «Динамо», Бакудің «Қарабах», Ташкенттің «Пахтакор», Душанбенің «Динамо», Бішкектің «Абдыш-Ата», Мәскеудің «Спартак» командалары, еліміздің әр өңірінен келген 16 команда өзара бақ сынады.</p>
Үш күнге созылған тартысты кездесулер нәтижесінде жартылай финалға «Астана», «Пахтакор», «Спартак» және елордалық «Айбын» командалары жолдама алды.
Алғашқы жартылай финалда «Спартак» пен «Пахтакор» жасөспірімдері күш сынасты. Мәскеулік команда есеп ашқанымен, ойын соңына таман өз қақпасына гол жіберіп алды. Шешуші сәт – сериялық пенальти нәтижесі өзбекстандық клубтың пайдасына шешілді. «Спартак» бір соққыдан мүлт кетіп, финалға берілер жолдаманы «Пахтакор» ұтып алды.
Екінші жартылай финалда «Астана» командасы «Айбынды» айқын басымдықпен жеңіп, финалға шықты (3:0).
Астана қаласы әкімдігі, Дене шынықтыру және спорт басқармасы, Қазақстан футбол федерациясының қолдауымен өткен турнирдің шешуші ойынында «Астана» мен «Пахтакор» жасөспірімдері шеберлік көрсетті. Қос команда да бар күш-жігерін жұмсап, тартысты ойын өрнегін ұсынды. Алайда өзбекстандық жас футболшылардың шабуылы нәтижелі болып, матч 2:0 есебімен «Пахтакордың» жеңісімен аяқталды.
Үздік үштікті «Спартак» командасы түйіндеді.