Ниязов түрмеден босатылды: Жапаров кешірім жасады

Қырғызстан президенті Садыр Жапаров бұрынғы президент әкімшілігінің басшысы болған Фарид Ниязовқа кешірім жасап, оны түрмеден босату туралы шешім қабылдады, деп хабарлайды <a href="/" target="_blank" rel="noopener noreferrer">Egemen.kz</a>.

Фарид Ниязов әр жылдары мемлекеттік қызметте еңбек етіп, журналистика саласында жұмыс істеген. Сондай-ақ ол бұрынғы президент Алмазбек Атамбаевтың кеңесшісі болып, кейін оның әкімшілігін басқарған.

Ниязовқа қатысты соңғы үкім 2019 жылғы Қой-Таш ауылындағы оқиғаларға байланысты шығарылған еді. Сол кезде арнайы қызмет өкілдері экс-президент Атамбаевты ұстауға әрекет жасап, операция тәртіп сақшылары мен оның жақтастары арасындағы қақтығысқа ұласқан.

Қырғызстанда Қамшыбек Тәшиевке қатысты сот процесі өтіп жатыр

Сот Ниязовты жаппай тәртіпсіздік ұйымдастыру, билік өкіліне күш қолдану, кепілге адам алу және басқа да баптар бойынша кінәлі деп танып, оны 7 жыл 8 ай мерзімге бас бостандығынан айырған болатын. Сонымен қатар ол үш жыл бойы мемлекеттік қызмет атқару құқығынан айырылды.

Кейін Бішкек қалалық соты істі қайта қарап, үкімнің кейбір тұстарын өзгерткенмен, Ниязовқа тағайындалған жаза мерзімін өзгеріссіз қалдырды.

Еске салайық, Қой-Таш оқиғасы бойынша Алмазбек Атамбаев 11 жыл 3 айға бас бостандығынан айырылған еді. Осыған қарамастан, Қырғызстан президенті Садыр Жапаров Фарид Ниязовқа кешірім жасау туралы шешім қабылдады.