Оқу деңгейін анықтайтын жүйе
<p style="text-align: left;">Гарвард университетінің түлегі Әсел Амангелді АҚШ-та жасанды интеллект компаниясының құрылтайшысы атанды. Ол мектеп оқушыларының үлгерімін таразылап, емтихан нәтижесін болжайтын әрі оқу үдерісіндегі олқылықтарды ерте анықтайтын жүйе жасап шығарған.</p>
Зерттеу жұмысы өткен жылдың қыркүйегінде басталған. Ақыры ақпан айында Вирджиния штатындағы 28 мектепте іске асырылды. Нәтижесінде, 100-ден астам мұғалім оқушыларының білім деңгейін бағалауға мүмкіндік алған. Жүйе оқушының сынақтан өту ықтималдылығын 99 пайыз дәлдікпен, ал жалпы нәтижесін 86 пайыз дәлдікпен болжаған. Сонымен қатар әр шәкірттің қызығушылығына қарай ұсыныс әзірленген.
«АҚШ мектептерінде жасанды интеллектіге күмәнмен қарайтын сарапшылардың болғаны рас. Бірақ олар жұмысымыздың нәтижесін көріп, жобамызды жоғары бағалады», дейді Ә.Амангелді.
Осы жетістіктен кейін жоба авторы «Predictive Learning Insights» («Болжамды оқыту талдаулары») атты білім технологияларына бағытталған компанияның құрылтайшысы әрі президенті атанды. Бүгінде ол АҚШ-тың жұмыс визасын рәсімдеп жатыр.
Сонымен қатар Гарвард университетінің түлегі 2022 жылы өзі негізін қалаған отандық «Tilu» ағылшын тілі мектебін басқаруды тоқтатқан жоқ. Биыл бұл жобаға да жасанды интеллект элементтері енгізіліп, жеке цифрлық платформасы іске қосылған. Осылайша, отандасымыз екі елдегі білім бастамаларын қатар дамытуға ниетті.
«Тіпті ең асқақ армандар да орындалады. Сондықтан биік мақсат қойып, оған жету үшін аянбай еңбек ету керек», дейді Гарвард түлегі.
Зарина ТАЙЛАҚ,
Л.Н. Гумилев атындағы ЕҰУ студенті