Даляньдағы диалог: инновацияға негізделген әріптестік
<p style="text-align: left;">Қытайдың Далянь қаласында өткен «Жазғы Давос» дүниежү­зілік экономикалық форумында жаһандық экономиканың келе­шегі, цифрландыру, жасанды интеллект пен инвестициялық ынтымақтастық мәселесі талқыланды. Форумда Премьер-министр Олжас Бектенов бірқа­тар мемлекет және халықаралық ұйым өкілдерімен кездесті.</p>
Қытайдың Далянь қаласы бұл күндері әлемдік саясаткерлер мен бизнес көшбасшыларының басын қосты. Мұнда өткен Дүниежүзілік экономикалық форумның жаңа чемпиондарының жыл сайынғы XVII кездесуіне ондаған елдің үкімет басшылары, халықаралық ұйымдардың жетекшілері, ірі компаниялар мен сарапшылық қауымдастық өкілдері қатысты.
Форумның негізгі тақырыптары технологиялық жаңғыру, жасанды интеллект, цифрлық экономика, инвестиция мен әлемдік өсімнің жаңа көздерін іздеуге арналды. Еліміздің Премьер-министрі Олжас Бектенов форум аясында Моңғолия Премьер-министрі Ням-Осорын Учралмен кездесті.
Келіссөздер барысында сауда, өнеркәсіп кооперациясы, тау-кен металлургиясы, көлік-логистика, агроөнеркәсіп, цифрландыру және ғарыш технологиялары салаларындағы ықпалдастық мәселелері қаралды. Тараптар Моңғолия Президентінің биылғы сәуірдегі Астанаға мемлекеттік сапары кезінде қол жеткізілген уағдаластықтардың орындалу барысын талқылады. Екі ел басшылары қойған өзара сауда көлемін 500 млн долларға жеткізу міндеті де назардан тыс қалған жоқ. Кездесу қорытындысында екі мемлекет экономиканың барлық маңызды бағыттарында байланыстарды нығайтуға дайын екенін растады.
Даляньдағы келіссөздердің тағы бір бағыты Оңтүстік Азия өңірімен байланысты болды. Бангладеш Халық Республикасының Премьер-министрі Тарик Рахманмен өткен кездесуде сауда, инвестиция, көлік және цифрлық технологиялар мәселелері сөз болды. Олжас Бектенов елімізде жүргізіліп жатқан реформалар инвестициялық ахуалды жақсартып, халықаралық әріптестікке жаңа мүмкіндіктер ашып отырғанын жеткізді.Кездесу барысында экономиканың басым секторларында жаңа бірлескен жобаларды іске асыруға өзара қызығушылық білдірілді.
Форум аясындағы маңызды кездесулердің бірі Дүниежүзілік экономикалық форумның президенті әрі бас директоры Алоис Цвингимен өтті. Тараптар цифрлық трансформация, жасанды интеллект, инвестиция тарту мен адам капиталын дамыту бағыттарындағы ынтымақтастық мәселелерін талқылады. Қазақстан тарапы форуммен ұзақмерзімді сараптамалық әріптестік орнатуға мүдделі екенін білдірді. Сондай-ақ «Бәйтерек» холдингі арқылы бірлескен бастамаларды жүзеге асыру мүмкіндігі қарастырылды.
Кейінгі жылдары еліміз шетелдік капитал тарту бағытында бірқатар жүйелі қадам жасады. Инвесторларға арналған қолдау тетіктері кеңейтілді, арнайы визалық режімдер енгізіліп жатыр, салықтық және кедендік жеңілдіктер қолданылады. Жобаларды сүйемелдеу «бір терезе» қағидатына негізделген.
Даляньдағы кездесулер еліміздің халықаралық экономикалық байланыстарды әртараптандыруға, жаңа нарықтарға шығуға әрі технологиялық серіктестікті күшейтуге ұмтылысын тағы бір мәрте көрсетті. Бүгінде жаһандық бәсеке инвестиция көлемімен ғана емес, инновация мен білімге негізделген әріптестік сапасымен де өлшенеді. Еліміз дәл осы бағыттағы ұстанымын халықаралық алаңда айқын танытып отыр.